Талааннаах салайааччы, бастыҥ тренер, үтүө доҕор Дмитрий Александрович Мосенков сырдык кэриэһигэр
волейбол түһүлгэтэ Хонууга кулун тутар 22-23 күннэригэр тэрилиннэ. Дмитрий Александрович үтүө аатын санаан,
Индигир умнаһыгар сытар ыаллыы оройуоннартан Абый, Аллайыаха сүүмэрдэммит хамаандалара, оройуон
нэһилиэктэриттэн уопсайа 15 хамаанда(8 эр дьон уонна 7 дьахталлар) ыалдьааччыларга бэрт хатыһыылаах
оонньуулары бэлэхтээтилэр. Ыалдьааччылар «Индигир кубогыттан туох да итэҕэһэ суох оонньуулар буоллулар»
диэн астына бэлиэтээтилэр. Дмитрий таптыыр спордун көрүҥэ сайдарыгар туох баар күүһүн-уоҕун, сатабылын
ууран туран үлэлээбитэ. Кини дьарыктаан таһаартаабыт оҕолоро билигин даҕаны спорду өрө тутан, көтөр
мээчиги өрө тэйитэн оонньуу сылдьаллара да элбэҕи этэр.
Күрэхпитигэр төнүннэххэ эр дьоҥҥо 8 хамаанда, дьахталларга 7 хамаанда иккилии группаҕа хайдыһан
оонньоотулар. Барыллааһын оонньуулар бэрт сытыытык бардылар. Икки өттүттэн сытыы быһыы охсуулар,
сымара таас курдук халбаҥнаабат блоктар, чаҕылхай көмүскэнии тоһуйуулар бу барыта волейбол көрүҥүн
быстыспат сорҕото буолар. Маны барытын биһиги илэ харахпытынан көрөн олус дуоһуйдубут. Бу күрэххэ
кыттаары билигин Дьокуускайга үөрэнэр Дмитрий быраата, республикаҕа биллэр волейболист, бэйэбит уолбут
Андрей Мярикянов кэлэн оонньоон күрэхтэһиини киэргэттэ. Ону таһынан бу күрэххэ эрэ кыттаары Мичил Хабаров
кэлэн оонньообута, волейбол оонньуутугар тус сүрэҕинэн ыалдьарын көрдөрөр. Аллайыаха хамаандаларыгар
эмиэ Дьокуускай куораттан күүстээх оонньооччулар Виктория Чикачева, Захар Рожин кэлэн оройуоннарын чиэһин
олус үчүгэйдик көмүскээтилэр. Балаһыанньа быһыытынан группаттан 2 күүстээх хамаанда тахсан салгыы
оонньуур быраабы ылар. Эр дьоҥҥо күүтүллүбүтүн курдук ыалдьыттарбыт Аллайыаха, Абый хамаандаларын
кытта Хонууттан “Кэлээдьин” уонна “Дохсун” тахсыбыттара. Кэрэ аҥаардарга Хонууттан “Сириус” уонна “Кэрэли”
хамаандаларга Абый, Аллайыаха хамаандалара кыттыспыттара. Финал аҥарыгар оонньуулар олус
тыҥааһыннаахтык барбыттара. Эр дьоҥҥо буоларын курдук Абый уонна “Кэлээдьин” хамаандалар оонньуулара
бэрт сытыытык, бүтэһик очкоҕа дылы хайа хамаанда финалга тахсара биллибэт этэ. Бастакы партияҕа
Кэлээдьиннэр турнир биир бастыҥ оонньуутун көрдөрөннөр холкутук кыайыыны суруммуттара. Иккис партияҕа
аны ыалдьыттарбыт маннык балаһыанньаны кытта сөпсөспөттөрүн биллэрэн, күүстээх оонньууну көрдөрдүлэр.
Манна абыйдарга туруорааччы оонньооччулара Петр Корякин хамаандатын күүстээх оонньооччуларын Кузьма
Банщиковы, Максим Неустроев сөпкө оонньотон, партияны баһылыы-көһүлүү туталлар уонна кыайыыны
суруналлар. Үһүс быһаарыылаах партияҕа хамаандалар эрбии биитинии эриһэн, олус кытаанах тыҥааһыннаах
оонньууну ыалдьааччыларга бэлэхтээтилэр. Саала иһэ дьон ыһыытынан оргуйан олордо. Бүтэһик быһаарыылаах
очкону сурунан уонна финалга оонньуур быраабы ыалдьыттарбыт Абый хамаандата ылла. Иккис оонньууга эмиэ
икки өттүттэн күүстээх састааптаах “Дохсун” уонна Аллайыаха оройуонун хамаандата оонньоотулар. Манна
дохсуннар туруорааччылара Владимир Максимов хамаанда оонньуутун сөпкө аттаран оонньотон 2:0 ахсаанынан
сабырыйа туттулар. Манна аллайыаха хамаандатыгар Рожин Захар олус күүскэ оонньоон, олохтоохторго үчүгэй
өйдөбүлү хаалларда. Күүстээх кимэр охсуулара, өрө ыстанан тахсан подачалара утарсааччыларыгар
ыарахаттары үөскэтэ сырытта.
Онон финалга Абый оройуонун хамаандата уонна Хонууттан “Дохсун” хамаанда, оттон үһүс бочуоттаах
миэстэ иһин киирсиигэ «Кэлээдьин», Аллайыаха хамаандалара оонньоотулар. «Кэлээдьин» уонна Аллайыаха
хамаандаларын оонньууларыгар кэлээдьиннэр бу иннинээҕи сыыһаларын хатылаабакка эрэбиллээхтик оонньоон
доҕордорун, тренердэрин мемориалын боруонса мэтээлин кэтэр чиэскэ тигистилэр. Оттон финальнай оонньуу
Абый, Муома икки ардыларыгар өрүү буоларын курдук эмиэ үчүгэй киирсиилээх сытыы буолла. «Дохсун»
хамаандатын уолаттара кубок дьиэбитигэр хаалыахтаах диэн санаанан салайтаран, ханан да дьиэк биэрбэккэ
икки партияны субуруччу кыайан мемориал кыайыылааҕынан буоллулар уонна Кубогы өрө анньар чиэскэ
тигистилэр.
Кэрэ аҥаардар оонньуулара эмиэ эр дьон оонньуутуттан кыра да сүөм саҕа намыһаҕа суохтук аастылар.
Манна Аллайыаха олус күүстээх оонньууну көрдөрөн, эрэллээхтик пьедестал үрдүкү үктэлигэр туран кубогы
күөрэччи тутан моонньуларыгар кыһыл көмүс мэтээли иилиннилэр. Сүрүн оонньооччулара Виктория Чикачева
олус күүскэ оонньоон хамаандатын эрэллээхтик кыайыыга аҕалла диэтэххэ сыыспат буолуохтаахпыт. Иккис
миэстэҕэ Хонууттан “Сириус” хамаанда таҕыста. Үһүс миэстэни эмиэ бэрт ыһыылаах-хаһыылаах оонньууга Абый
хамаандатын хотоннор“Кэрэли” хамаандата тахсан бочуоттаах үһүс миэстэни ыллылар. «Кэрэли» хамаандаҕа
Дмитрий Александрович төрөппүт кыргыттара Евгения, Антонина, Зоя оонньообуттара уонна аҕалара биэрбит
үөрүйэхтэрин ыһыктыбакка илдьэ сылдьалларын киһи эрэ барыта бэлиэтии көрдө.
Күрэх бэлиэ сонун түгэнинэн “Көрөөччү биһирэбилэ” анал аат олохтоммута уонна манна күрэххэ кэлбит дьон
бэйэлэрэ сөбүлүү көрбүт оонньооччуларыгар куоластарын биэрбиттэрэ буолар. Баһыйар үгүс куолаһы ылан
“Сириус” хамаандатын сүрүн оонньооччута Александра Максимова бу анал аат хаһаайкатынан ааттанна уонна
Д.А.Мосенков дьиэ кэргэнэ туруорбут анал бирииһи ылла. Өссө биир сонун көстүү “Бастыҥ ыалдьааччы” анал бириис анаммыта буолар. Бу бириис хаһаайыттарынан ыытыллар күрэхтэргэ өрүү кэлэн ыһыытаан-хаһыытаан
дьонноругар ыалдьар кыайыыларыгар күүстээх кыымын саҕар аҕам саастаах Юрий Егорович Никулин уонна
Софронов Юрий Николаевич буоллулар.
Дмитрий Александрович сырдык кэриэһигэр ыытыллыбыт волейбол региональнай күрэҕин “Бастыҥ
оонньооччута” анал аат Виктория Чикачева (Аллайыаха) уонна Андрей Мярикянов (Кэлээдьин) Д.А.Мосенков
дьиэ кэргэнэ туруорбут бириистэрин туттулар. Турнир бастыҥ охсооччуларынан Петр Корякин («Дохсун») уонна
«Сириус» хамаандаттан Александра Максимова буоллулар. Оттон хамаандалара пьедестал үктэлигэр
тахсалларыгар сүрүн кылааты киллэрбит оонньоочуларынан “Бастыҥ туруорааччы” анал ааты эр дьоҥҥо Абый
хамаандатыттан Петр Корякин, дьахталларга Аллайыаха хамаандатыттан Сардана Стручкова ыллылар. “Бастыҥ
көмүскээччи” анал аакка “Кэрэли” хамаандаттан Александра Слепцова уонна Иван Карпов “Дохсун” хамаанда
тигистилэр. “ДЮСШ” хамаандаттан Нарыйаана Дормидонтова уонна Төбүлэх хамаандатыттан Ефрем Ефремов
биһиги турнирбыт “Кэскиллээх оонньооччулара”ааты сүктүлэр. Күрэххэ кыттыбыт үгүс спортсменнар
спонсордартан анал бириис хаһаайыннарынан буоллулар.
Тэрийээччилэр ааттарыттан биһиги барҕа махтал тылларын аныыбыт, биһиги ыҥырыыбытын ылынан, үтүө
доҕорбут, салайааччыбыт, талааннаах тренер Дмитрий Александрович Мосенков сырдык аатын кэриэстээн
хамаанда тэрийэн кэлбит доҕотторбутугар, Төбүлэх нэһилиэгин аҕа баһылыгар Петр Владимирович
Никифоровка, ыаллыы сытар улуустарбыт, Аллайыаха аҕа баһылыгар Яков Гаврильевич Елисеевкэ, Чокурдаах
КСК директорыгар Елена Евгеньевна Шкулеваҕа, спорткомитет салайааччытыгар Евгений Дмитриевич
Слепцовка, Ариса Агитовна Суздаловаҕа, Абый оройуонун аҕа баһылыгар Владимир Вадимович Новиковка,
Абый оройуонун спорт эдэр ыччат уонна дьиэ-кэргэн кэмитиэтин сүрүннүүр үлэһитигэр Евдокия Софроновна
Жирковаҕа, волейболистары бэйэтэ тиэйэн аҕалбыт бэйэбит уолбутугар, Абый оройуонун баһылыгын
солбуйааччыта Леонид Евгеньевич Марковка, мемориалга кыттыыны ылбыт хамаандалар бары
оонньооччуларыгар, чуолаан хапытааннарыгар, судейскай коллегияҕа кылаабынай суудьуйа Владислав
Германович Неустроевка барҕа махталбытын биллэрэбит, тус олоххутугар, чугас дьоҥҥутугар дьолу-соргуну,
саха алмааһыныы кытаанах доруобуйаны, өссө да кылаан чыпчаал ситиһиилэр кэлэ турдуннар.
Спортсменнар, ыалдьааччылар ааттарыттан Дмитрий Александрович кэргэнигэр Антонина Ивановнаҕа,
кыргыттарыгар Евгенияҕа, Антонинаҕа, Зояҕа, бары аймахтарыгар, табаарыстарыгар, бииргэ үлэлээбит
коллегаларыгар маннык кэрэ спорт бырааһынньыгын бэлэхтээбиттэригэр барҕа махтал тылларын аныыбыт
уонна бары кэрэни, сырдыгы баҕарабыт.
Чөл олохтоох буолуҥ, спордунан дьарыктаныҥ.
А.В. Слепцов