Дьиэ кэргэн — олох төрдө

Этнопедагог, педагогика билимин хандьыдаата, ХИФУ дассыана Г. С. Попова — Санаайа төрөөбүт күнүгэр, сэтинньи 28 чыыһылатыгар,75 сааһыгар аналлаах «Дьиэ кэргэн — олох төрдө» диэн тиэмэнэн төрөппүт сугулаана Муома орто оскуолатыгар тэрилиннэ.
Сугулаан биэс түһүмэҕинэн ыытылынна: 1. Дьиэ кэргэҥҥэ истиҥ сыһыаны олохсутуу; 2. Ийэ тылынан оҕону иитии; 3. Уол оҕо — эрэллээх эркин, дурда-хахха; 4. Кыыс оҕо — кэскил кэрэһитэ; 5. Аныгы саха ыала.
Тэрээһин саҕаланыыта Галина Семеновна үөрэппит оҕолоро Анна Слепцова,Юрий Винокуров, Валентина Новгородова, Артем Корнилов уонна оскуола үөрэнээччитэ Саша Борисов бу биэс тиэмэ ис хоһоонун арыйар хоһооннору ааҕан, тута кэпсэтии тыыныгар киллэрдилэр. Кэлбит төрөппүттэр иитии туһунан санааларын аһаҕастык үллэһиннилэр, кэпсэтиигэ көхтөөхтүк кытыннылар.Аҕалар ыҥырыыны ылынан, оҕо иитиитигэр бэйэлэрин тус көрүүлэрин дьоҥҥо тиэрдибиттэрэ болҕомтону тарпыта. Ийэ тылын иҥэрии, оҕону сахалыы тыынынан иитии кыһалҕалара сытыытык турдулар, ону быһаарар суоллар тобулуннулар. Оҕону үлэҕэ сыһыарыы, дьарыктаах буолара үтүө түмүккэ тиэрдэр диэн санаа этилиннэ. Эдэр ыаллар билиҥҥи үйэҕэ көлүөнэ дьонноро иҥэрбит үгэстэрин тутуһабыт, оҕолорбутугар утуму салгыыбыт диэн этиилэрэ үөрдэр.
Сугулаан кэмигэр Г. С. Попова 90-с сылларга ыыппыт тэрээһиннэрин уһулуга (видеота) көһүннэ, ол саҕана баар төрөппүттэр билэр оҕолорун, бэйэлэрин көрөн сэҥээрдилэр, оҕо саастарын санаан ыллылар.
Бу күн Галина Семеновна экраҥҥа көстөн Муома дьонун, үөрэппит оҕолорун, биир идэлээхтэрин сахалыы сайаҕас тылынан эҕэрдэлээтэ, оройуоҥҥа үлэлэспит дьыалата салҕана турарыттан үөрүүтүн үллэһиннэ.
Сугулаан бүтүүтэ оскуола салалтата кэлбит төрөппүттэргэ дьиэ кэргэн дьоллоох олоҕун түстүүр кэс тыллардаах бэлэҕи үөрүүлээх быһыыга майгыга туттарда.
Төрөппүттэр олус сэргэх кэпсэтии, туһалаах ырытыһыы буолла диэн санааларын эттилэр. Оҕо хайдах киһи буолан тахсара төрөппүт иитиититтэн улахан тутулуктаах, норуот кэскилин, олох укулаатын дьиэ кэргэн түстүүр диэн толкуйу бары ылыннылар.