Чуумпу Кытылга устудьуоннар кэнсиэрдэрэ

Чуумпу Кытылга устудьуоннар кэнсиэрдэрэ үрдүк таһымҥа ааста. Оҕолорбут Ороһуоспа күнүгэр үгэскэ кубулуйбут эҕэрдэ кэнсиэри бэлэх ууннулар. Кэнсиэри иилээн-саҕалаан Антон Хабаров ыытта. Тэрээһин саҕаланыыта сахалыы сиэринэн уотунан ыраастаныы оҥордулар. «Дьүрүһүй»хомус ансаамбылын выпускниктара хомуска сахалыы матыыптары оонньоотулар.

Эдэр эрчимнээх уолаттар-кыргыттар үҥкүү арааһын үҥкүүлээн, Мила Никулина ырыатын, уолаттар Эрхан Стручков, Леонид Соркомов, Ефрем Эверстов триоларын, Мила Никулина, Леонид Соркомов, Ефрем Эверстов триоларын, көрдөөх сценкалары көрөөччүлэр дохсун ытыс тыаһынан уҕарыппакка доҕуһуоллаатылар, браво-бис бөҕө түһэрдилэр. Оҕолорбут бары Саха сирин араас үөрэх кыһаларыгар үөрэнэллэр.

Ол курдук, үөрэнэр сирдэрин ааттаатахха, Олеся Кириллина — Дьокуускайдааҕы финансовай-экономическай колледж, Сандал Николаев — ХИФУ историческай факультета /политолог/, Антон Хабаров — ХИФУ горнай институт, 4 курс, Максим Хабаров -ХИФУ математика, информатика института, 3 курс, Степан Григорьев — Региональнай техническэй колледж, Мирный куорат, Айыллаана Иванова — ЯИПК /швея/, Яна Старкова — Дьокуускайдааҕы медколледж, Леонид Соркомов — ХИФУ горнай институт, нефтегазовое дело, Александр Никулин — Нам техникума, Кирилл Егоров — «Синергия» Дьокуускайдааҕы цифровой колледж, Мила Никулина — М.Жирков аатынан Дьокуускайдааҕы музыкальнай колледж.

Эдэр ыччат Павел Соркомов, ыалдьыттарбыт Эрхан Стручков, Даниил Готовцев уонна Төбүлэхтээҕи А.Ф.Старков аатынан орто оскуола улахан сүһүөх кылааһын үөрэнээччилэрэ Оксана, Ефрем Эверстовтар, Алика Кириллина, Данил Соркомов күүс-көмө буоллулар.

Людмила Стручкова