Бүгүн транспорт үлэһиттэрин күнэ бэлиэтэнэр. Ол эрэн
«Арктика суоллара» КТ Муоматааҕы суол учаастагын үлэһиттэригэр бу күн бырааһынньык буолбакка, үлэ күнэ. Бу кэмҥэ суол оҥорооччулар саамай үлэлэрин үгэнэ.
Суол — хоту дойдуга саамай тыын кыһалҕа. Үөс сиртэн ыраах олорор буоламмыт, кыһыҥҥы айан суола баар кэмигэр, бэрт кылгас бириэмэҕэ, нэһилиэнньэ туттар табаара, аспыт-үөлбүт, тутуу матырыйаала тиэйиллэр. Айан суолун «Арктика суоллара» КТ Муоматааҕы суол учаастага (дириэктэр Константин Терешкин) көрөр-истэр, хааччыйар.
Суолу оҥорооччулар тоһуттар тымныыны, сирилиир күүстээх тыалы, буурҕаны аахсыбакка дьүккүөрдээхтик суолга үлэлииллэр. Ыарахан үлэлээх дьон. Ардыгар сүүрбэччэлии хонукка тимир көлөлөрүн аргыс оҥостон дьиэлэриттэн-уоттарыттан, дьонноруттан тэлэһийэн ыраах айаҥҥа сылдьан үлэлииллэр.
Оройуоммут сайдыытыгар бэриниилээхтик үлэлии сылдьар суол оҥорооччулары идэлээх күҥҥүтүнэн эҕэрдэлиибит!
«Арктика суоллара» КТ Муоматааҕы суол учаастагын машиниһа Николай Атласов — бу тэрилтэ биир бастыҥ үлэһитэ.
Кини аҕатын, аатырбыт механизатор Христофор Дмитриевич Атласов туйаҕын хатаран быйыл уруулга олорбута отут сыла. Ыраах айан суолугар «Индигир суоллара» ААУо саҕаттан үлэлиир.
Коля олох кыратыттан аҕатын тыраахтарыгар олорсо сылдьан үлэ үөрүйэхтэригэр үөрэммит. Ол сылдьан сэттис-ахсыс кылаастарга аҕатын тыраахтарын ыытары баһылаабыт. Ол кэннэ Улахан Чыыстай орто оскуолатын «Трактороведение» куурус удостоверениелаах бүтэрбит. «Бастакы рейсэм — от тиэйиитэ этэ. Син ыраах сиртэн тиэйэр этибит. Аны тиэйэн аҕалыыта диэн биирэ, сүрүнэ диэн оту ыспакка, суулларбакка аҕалыахха наада. Кэлин үлэлээн истэххэ уопутураҕын. Маҥнай «Искра» сопхуоска, онтон ОДьКХ-ҕа үлэлээбитим. Онтон «Индигир суоллара» тэрилтэҕэ ыраах айаҥҥа сылдьарым. Бу «Арктика суолларыгар» тэриллиэҕиттэн үлэлиибин», — диэн кэпсиир Николай.
Туруу үлэһит киһи удьуора салҕанар. Николай Христофорович улахан дьиэ кэргэн аҕата, эһээтэ. Аны бэйэтин уолаттарын техникаҕа сыһыарар. Улахан уола Богданныын биир сайын Уус Куйгаҕа баран суол оҥоһуутугар, муоста тутуутугар үлэлээбиттэрэ. Билигин иккис уола Ян бу тэрилтэҕэ аҕатын кытта бииргэ үлэлиир. Атласовтар суоппар династиялара салҕанар.