Баһылык бирииһигэр

Сыл саҕаланыыта үһүс сылын оройуон баһылыгын бирииһигэр волейболга күрэх ыытылынна. Биһиги оройуоммутугар волейбол спорт биир бастыҥ көрүҥэ буоларын билинэбит. Ол курдук волейболга араас таһымнаах күрэхтэһиилэр тиһигин быспакка ыытыллаллар. Д.В. Аммосов бирииһин күрэҕэр дьахталлар уонна эр дьон сэттэлии хамаандалара күөн көрүстүлэр. Чугас сытар нэһилиэктэртэн Сайдыы хамаандата кыттыбатаҕа көрөөччүлэри соһутта. Күүстээх хамаанда кэлэн оонньуулары сытыырхатыахтаах этэ. Төбүлэхтэр бэйэлэригэр улахан тэрээһиннэр ыытыллар буолан эмиэ кыайан кыттыбатылар. Онон инникитин тэрээһиннэри былаанныырга саҥа дьыллааҕы дьаһаллары бэлиэҕэ ылан наардаан туруорар ордук буолсу. Оонньуулары көрө олорон волейболунан дьарыктанар эдэр ыччат элбээбитин сэҥээрдим. Волейбол элбэх табыгастаах хамсаныылары эрэйэр буолан эдэрдэргэ ордук барсар. Быйылгы күрэх арыйыытынан Соболоох эдэр ыччаттарын хамаандата буолла диэтэхпинэ улаханнык сыыспатым буолуо. Урукку сылларга сороҕор төрүт да кыттыбат хамаанда быйыл оройуон биир күүстээх «Дохсун» хамаандатын кытта үһүс миэстэ иһин киирсибитэ элбэҕи этэр. Волейбол күрэхтэригэр сөбүлээн сылдьар ыалдьааччылар этэллэринэн кэнники кэмҥэ волейболистар кулууптарынан хайдан маастарыстыбалара мөлтүөхчэ буолбут эбит. Маны таһынан тустаах Спартакиадаҕа тэрилтэлэринэн арахсыы саҥа талааннары арыйар эрээри сороҕор сытыы киирсиилэри сымсатар эбит. Оройуон чулуу оонньооччуларын түмсүү хамаандатын тэрийэн инники ситиһиилэргэ бэлэмниэххэ баара дэһэллэр өр сыллаах уопуттаах ыалдьааччылар.

Быйылгы күрэх соһуччу көстүүтүнэн өр сылларга лидердээбит «Кэлээдьин» хамаанда финалга Индигир хамаандатыгар 2:1 счетунан хотторбута буолар. Индигирдэр хамаандаларын капитаннара Афанасий Слепцов уолаттары табыгастаахтык оонньотон кыайыыга аҕалбытын бэлиэтиир тоҕоостоох. Бу хамаандаҕа эдэр оонньооччу Петр Латышев олус табыллан оонньоото диэн сыаналаатым, кинини оройуон түмсүүлээх хамаандатыгар киллэрэн оонньоттоххо тыас таһаарыан сөп быһыылаах. Биир оннук кэскиллээх волейболист Алексей Жирков буолууһу диэн көрдүбүт. Бу уолаттары уопуттаах волейболистар дьарыктаатахтарына кэскиллээх хамаанда баар буолсу.

Кыргыттарга элбэх үчүгэйдик оонньуур кыргыттар эбиллибиттэр. Кубок ылбыт «Кэрэли» хамаандаҕа оонньообут Саргылана Тарабукинаны, Александра Слепцованы кытта тэҥҥэ быһан саайар эдэр кыргыттар Эрика Ноговицына, Калерия Атласова баар буолбуттара инникигэ эрэли түстүүр. Суон Тиит учаастагыттан элбэх кыыс волейболга оонньуур буолбута харахха быраҕылынна. Маладьыастар! Харахпар Александр Васильевич Слепцов 20-чэ сыллааҕыта кырбас кыра оҕолору батыһыннара сылдьан спорт араас көрүҥнэригэр дьарыктаабыта көстөн кэлэр. Элбэхтик кинилэр тустарынан сюжеттары оҥорор буоларбыт. Билигин ол оҕолор, кинилэр оҕолоро спортка Муома оройуонун ааттата сылдьалларыттан киһи эрэ үөрэр. Дьэ ити курдук эрэл санаалаах волейбол күрэҕин түмүктээтибит. Ол курдук күрэх түмүгүнэн эр дьоҥҥо муҥутуур кыайыылааҕынан «Индигир » хамаанда таҕыста, иккис «Кэлээдьин», үһүс «Дохсун» хамаандалар буоллулар. Дьахталларга «Кэрэли» хамаанда бастаата, «Үрдэл» иккистээтэ, урукку сылларга Индигир оройуоннарыгар саамай бастыҥ буолан аатыра сылдьыбыт «Олимп» хамаанда үһүс буолла. Ити көлүөнэлэр уларыйыыларын көстүүтэ. «Олимптар» билигин да күүстээх утарсыыны оҥорор кыахтаахтара сөхтөрөр. Номинацияларга бастыҥнар буоллулар:

«Лучший разыгрывающий» — Павлова Мария «Үрдэл», Слепцов Афанасий «Индигир», «Лучший нападающий» -Тарабукина Саргылана «Кэрэли», Жирков Алексей «Кэлээдьин», «Лучший игрок» — Слепцова Александра «Кэрэли», Уваровский Мичил «Индигир». Индигирдэр хамаандаларын Буор Сыһыыттан нэһилиэк баһылыга Прокопий Семенович Федоров бэйэтэ массыынанан тиэйбитэ, оонньуулларыгар тэҥҥэ ыалдьан бииргэ сылдьыспыта хайҕанар эрэ. Баһылык ыччатын кытта тэҥҥэ сылдьыһар буоллаҕына үлэ тахсыылаах буолуохтаах диэн эрэниэххэ. Волейболга күрэхтэр саҕаланнылар эрэ сыл устата элбэх тэрээһин былааннанар, онно спортсменнарга саҥа ситиһиилэри баҕарабын.