Бэҕэһээ Дьокуускай куоракка Арктика күнүн бэлиэтиир тэрээһиннэр чэрчилэринэн «Сияние звезд Арктики» диэн бэрт сэргэх концерт ыытылынна. Манна Арктика оройуоннарыттан 8 народнай коллектив хотугу дойду оһуордарын үҥкүүгэ, ырыаҕа хоһуйан көрөөччүлэргэ дойду ахтылҕанын күөдьүттүлэр. Биһиги оройуоммутуттан «Һээку» уонна «Тэтим» ансамбллар үҥкүүлэрэ дьон сэҥээриитигэр турдулар. Маны таһынан биир дойдулаахтарбыт «Туймаада» государственнай ансамбль солиһа Николай Роббек, эдэр талаан Илларион Садовников, «Осикат» ЭКК ырыаһыта Ирина Иванова бу киэһэни ырыанан киэргэттилэр. Хотугу сир кэрэ айылҕатын, көмүс манньыаттарын-табалары көрдөрөр видеохартыыналар, эрчимнээх үҥкүүлэр, нарын ырыалар, туундара кыылларын саҥатын ураты толоруулар көрөөччүлэри чахчы Арктика алыптаах долгураҥар ыалдьыттаттылар. Арктика кытылларыгар олорор омуктар кыраһыабай таҥастарын эгэлгэтэ көрөөччүлэри сөхтөрдө. 2 чаастаах концертнай программа биир тыынынан ылыныллан биллибэккэ да ааста. Муомалар концертка элбэх киһи кэлэн көрсүһүү үөрүүтүгэр куустардылар. Манна Муоматтан төрүттээхтэр эрэ буолбакка биһиги оройуоммутугар үлэлии сылдьыбыт дьон кытта кэлэн ахтылҕаннарын таһаардылар. Кинилэр Муома оройуонугар эвен культурата салгыы сайдарын сэҥээрдилэр, инники үлэлэригэр ситиһиилэри баҕардылар. Дьоро киэһэ «Һээку» народнай ансамблын толоруутугар сээдьэнэн түмүктэннэ.
Христина Кривошапкина
