Дьиэ кэргэн сылыгар анаммыт тэрээһиннэри түмүктүүр дьоро киэһэ тохсунньу 5 күнүгэр Арчы дьиэтигэр ыытылынна. Ол курдук манна Чыбааҕылаах нэһилиэгин бочуоттаах олохтоохторун Мария Петровна, Пахом Николаевич Никулиннар өр сыллаах сыралаах үлэлэрин, баай ис хоһоонноох олохторун туһунан кэпсиир «Ахтылҕаҥҥа куустаран «кинигэ сүрэхтэниитэ буолла.
Үлэһит дьиэ кэргэн туһунан кинигэни Никулиннар кыргыттара Табаһыт кыыһа Далбаара уонна Мария Пахомовна хомуйан оҥордулар. Кинигэҕэ Мария Петровна, Пахом Николаевич үрдүк көрдөрүүлээх үлэлэрин бииргэ үлэлээбит дьоно, элбэх оҕолоох ыал үрдүк дьолун аймахтара, ыччаттара ахтан суруйбуттар. Кинигэ сүрэхтэниитэ саҥа сыл бастакы алгыһынан саҕаланна. Арчы дьиэтин хаһаайката Ирина Николаевна Слепцова мустубут дьону үүммүт саҥа сыл үтүөнү эрэ аҕаллын диэн алҕаата. Никулиннар кыра кыыстара Мария Пахомовна уонна сиэннэрэ Татьяна Ивановна кинигэ сүрэхтэниитин олус истиҥник тэрийэн ыыттылар. Бу киэһэ маанылаах ыалдьытынан оройуон убаастанар олохтооҕо, краевед- библиотекарь Людмила Гаврильевна Степанова буолла, кини тыл киллэриитинэн бу кинигэ суруллубут эбит. Кинигэ матырыйааллара хомуллан баран 7 сыл буолан баран бэчээттэммит.
Дьиэ кэргэн сылыгар түбэһиннэрэн, үлэһит үтүөтэ оҕолордоох, оройуон социальнай экономическай сайдыытыгар үтүөлээх үлэлэрин сөпкө сыаналаан кинигэ үбүлээһинин оройуон дьаһалтата бэйэтэ уйуммут. Бу өйөбүл иһин Никулиннар ыччаттара Муома оройуонун аҕа баһылыгар Дмитрий Аммосовка, культура управлениетын салайааччытыгар Юрий Черовка Махтал суруктары туттардылар. Үлэһит дьиэ кэргэҥҥэ анаммыт киэһэ истиҥ ахтыыларынан, нарын ырыаларынан доҕуһуолланна.