Аҕа баһылыгын Харыйата

Ааспыт 2024 сылга оройуоммут оҕолоро билимҥэ, успуорка, култуураҕа үгүс ситиһиилэммиттэрэ. Талааннаах ыччаттарбыт Аан дойдуга, Арассыыйаҕа, Өрөспүүбүлүкэҕэ Муома аатын ааттаппыттара, киэҥ эйгэҕэ биллэрбитттэрэ. Ол курдук, Индигир орто оскуолатын үөрэнээччилэрэ Сайынаара Андросова, Альмира Слепцова, Кира Никифорова уонна Федора Коркина Москва уонна Сочи куоракка буолбут Арассыыйатааҕы научнай-практическай кэмпириэнсийэлэргэ үрдүк ситиһиигэ тиксибиттэрэ, Улахан Чыыстай орто оскуолатын “Һонҥачаан” оҕо фольклорнай ансаамбыла Бүтүн Арассыыйатааҕы үҥкүү олимпиадатын (Казань к.) кыайыылааҕа буолбута, Оҕо искусствотын оскуолатын “Радость тундры” норуодунай ансаамбыла Кытайга ыытыллыбыт “Академия успеха” Аан дойдутааҕы бэстибээлигэр I истиэпэннээх лауреат аатын сүкпүттэрэ. Ону сэргэ, оройуон үгүс оҕолоро Аан дойдутааҕы “Азия оҕолоро” оонньууларыгар, өрөспүүбүлүкэтээҕи араас тэрээһиннэргэ чаҕылхайдык кыттыбыттара.
Тохсунньу 11 күнүгэр Муома оройуонун Аҕа баһылыгын Харыйата оҕолорго Саҥа дьыл алыптаах күнүн бэлэхтээтэ. Харыйаҕа оройуон үрдүнэн 165 уһуйаан уонна оскуола оҕолоро ыҥырыллыбыт. Бу күн үөрэххэ, успуорка, араас куонкуруска ситиһиилээх үөрэнээччилэр, ону тэҥэ анал байыаннай дьайыыга сылдьар буойуннарбыт оҕолоро бырааһынньыктыы киэргэнэн Муома орто оскуолатын аактабай саалатыгар муһуннулар.
Тэрээһин саҕаланыыта Муома оройуонун Аҕа баһылыга Д. В.Аммосов уонна үөрэҕирии управлениетын начальнига А. А. Крупышева эҕэрдэ тылы эттилэр. Салгыы «Осикат» этно-култуурунай киин уонна оройуоннааҕы библиотека үлэһиттэрэ «Карлик Нос» остуоруйаны айымньылаахтык туруоран көрдөрдүлэр. Дмитрий Викторович хас биирдии оҕоҕо истиҥ тыллардаах добун суругу уонна анал бэлэҕи туттаран, оҕолор үөрүүлэрэ үрдээтэ.
Сыл түмүгүнэн оройуон оскуолаларын 10 бастыҥ үөрэнээччилэрэ бэлиэтэннилэр, анал бириэмийэнэн наҕараадаланнылар. Кинилэр сыл устата үөрэхтэригэр, успуорка, култуурунай тэрээһиннэргэ, научнай кэмпириэнсийэлэргэ чаҕылхай көрдөрүүлээхтэр, үгүс ситиһиилээхтэр. Уон оҕо аата ааттанан үрдүк сыанаҕа чиэстэннэ: Айуран Павлов (ОДОО), Кира Сметанина (СОО), Дмитрий Слепцов (ИОО), Камила Карпова (МНО), Светлана Слепцова (МОО), Виктория Архипова (МОО), Альберт Слепцов (МОО), Кирилл Баишев (УЧОО), Айаал Старков (УЧОО), Розана Старкова (ТОО).
Бу күн кэнчээри ыччаппыт оонньуу арааһын оонньоотулар, үҥкүүлээн сэргэхсийдилэр, оҕолордуун алтыстылар. Уһун сынньалаҥ кэннэ оройуон Аҕа баһылыгын Харыйатыгар сылдьан сүргэлэрэ көтөҕүлүннэ.
Кэнчээри ыччаппыт дойдубутун ааттатар, үрдүккэ талаһар холобурдарынан үүнэр көлүөнэни сирдиир үтүө дьон буола улааталларыгар баҕарабыт. Муоманы сайыннарар бастыҥ үлэһит буолуохтара диэн эрэнэбит.

Татьяна Данилова

Читайте дальше