Ахсынньы ый маҥнайгы күнүттэн, доруобуйаларынан хаччахтаах дьоннор декадалара ыытыллар. Сырыы аайы декада буолаары гыннаҕына общественник дьоннор, дьоммутугар тугу гынабыт, тугунан көмөлөһөбүт диэн толкуйга түһэбит. Урут диирбэр тиийэбин, нэһилиэкпитигэр инбэлиит ахсаана аҕыйах этэ. Биир сыл нэһилиэгинэн сибиэҺэй балык, туһах куобаҕа хомуйан дьоммутугар үллэрбиппитин өйдүүбүн. Кэлиҥҥи сылларга инбэлиит дьоммут ахсаана эбиллэ турар. Нэһилиэкпит кыра буолан , доруобуйаларынан хаччахтаах дьону кытары куруук алтыһа, билсэ-көрсө сылдьабыт. Хата, быйыл суолбут туран “Зеленай рейсинэн” оптовай ас кэлэн, сэргэхсийдибит. Уопсайынан, кырдьаҕастар күннэринэн уонна инбэлииттэр декадаларынан эрэ буолбакка сыл устата кыралаан үлэ бара туруохтаах. Аныгы үйэҕэ, оҕом ыарыһах, мин инбэлииппин диэн баран дьиэҕэ бүгэн олорор табыллыбат дии саныыбын. Киһи бэйэтин кыаҕынан уопсай дьыалаҕа кыттара, көмөлөһөрө сүрдээх хайҕаллаах. Холобур ааспыт нэдиэлэҕэ улахан кылаас оҕолоругар ыытыллыбыт «Булчуттар күрэхтэригэр» урут сопхуос үлэтигэр эдэр сылдьан, буспут -хаппыт алта бэтэрээн суоппардарбыт, трактористарбыт анал бириис туруордулар. Бу күрэххэ: Корякин Е.И., Татаринов Н.С., Уваровскай И.Г. кус, куобах, балык биэрдилэр. Бэтэрээннэрбит төһө да доруобуйаларынан мөлтөөтөллөр, син-биир хара тыа булчуттара, устар эбэ балыксыттара.
Татаринова Г.В., бэтэрээннэр сүбэлэрин саамай көхтөөх кыттыылааҕа, кыаҕа баарынан туох баар тэрээһиннэргэ куруук кыттар, ону сэргэ кэргэнэ Н. Татариновтыын оҕуруот олордон, күһүн өлгөм ылаллар.Хортуоскалара, хаппыысталара, моркуоптара, сүбүөкүлэлэрэ бөдөҥ буолар. Аймахтарыгар бэрсэн, эрдэ сииллэр. СӨ эргиэнин бочуоттаах үлэһитэ Никулина А.Л, нэһилиэк тэрээһиннэрин билсэ, сиэннэрэ куонкурустарга кытталларыгар куруук көмөлөһө олорор. Ардыгар, оптовайтан чэпчэки сыаналаах ас аҕалтаран атыылаан, олохтоохтору сэргэхситэр. Сибээспит быстар мөлтөх, түргэн интернет холбонуон наада. Ааспыт ыйга куоластааһыҥҥа Егор Слепцов күүстээх үлэни ыыппытын бэлиэтиир наада. Кини тохсунньу ыйга Хонууга айар кэнсиэрин ыыппыта. Сааһыары Бүлүү, Кэбээйи, Уус Алдан оройуоннарыгар гастроллаан, бэйэтигэр эбии харчы киллэриммитэ. Атласова Р.И. оскуоланы бүтэриэҕиттэн уһуйааҥҥа иитээччи көмөлөһөөчүтэ, инбэлиит оҕолоох ийэлэр Усманова М.И., Захарова Л.А., Осипова А.Р., Громова З.Ю. Голикова М.В. ааспыт ыйга СВО- ҕа үп-харчы киллэрэр сыалтан ыытыллыбыт тэрээһиннэргэ, кэнсиэргэ кытыннылар. Стручков А.Н. дворниктыырын быыһыгар, наһаа үчүгэйдик унту улларар, сакаас кэлэ турар. Ити курдук доруобуйаларынан хааччахтаах дьоммут, бары даҕаны сытынан, олорунан кэбиспэккэ, кустаан, балыктаан, муус ылынан, мас мастанан, оҕуруот аһын үүннэрэн, бэйэлэрэ дьарыктаах олороллор. Күүстээх санаа күүһэ биһиги да нэһилиэккэ баар.
Үтүө санаа ситимэ
