Атырдьах ыйын 28 күнүттэн балаҕан ыйын 2 күнүгэр диэри Муома улууһугар ыраас сытар учаастактарынан эрдэ куоластааһын ыытыллар. Бастакы күн АН-3 самолетунан Чуумпу Кытыл, Сааһыыр бөһүөлэктэригэр быыбар докумуоннара тиэрдилиннилэр. Ыраах сытар бөһүөлэктэргэ быыбары тэрийэр хамыыһыйаларга оройуоннааҕы Киин хамыыһыйа (М. Старкова) үөрэх ыытта, быһаарыылары оҥордо.
Ол курдук, быйылгы быыбарга оройуон быыбардааччылара Саха Өрөсрүүбүлүкэтин Ил Дарханын, норуот депутаттарын уонна оройуон депутаттарын Сэбиэтин талыахтара. Тиэрдиллибит докумуоннарга ыытыллар быыбар таһымыгар хандьыдааттары билсиһэллэригэр аналлаах плакаттар бааллар, быыбарга биэс бүлүтүөнү толоруллар. Ол курдук, бастакы бүлүтүөҥҥэ СӨ Ил Дарханын дуоһунаһыгар 4 хандьыдаат – Игорь Борисов, Виктор Губарев, Айсен Николаев, Гаврил Парахин. Иккис бүлүтүөҥҥэ норуот депутаттарыгар 6 баартыйа регистрацияны ааспыта. Үһүс бүлүтүөҥҥэ Халыма-Индигир уокуругар биир мандаакка үс хандьыдаат: Сахамин Афанасьев, Максим Каздобин, Владимир Малашкин. Төрдүс-бэһис бүлүтүөннэргэ оройуон депутаттарыгар биир кэлим уокурукка 4 баартыйа турбутуттан биири уонна 4 мандааттаах уокурукка алта хандьыдааттан түөртэн итэҕэһэ суох депутаттары талыахтара.
Көтөр аалынан ыраах сытар учаастактарынан хамыыһыйалар үлэлэрэ саҕаланна.