Алтынньы 14 күнүгэр Чурапчыга Айылгы норуот айымньытын дьиэтигэр саха бастакы балерината Аксения Васильевна Посельская төрөөбүтэ 100 сылыгар аналлаах тэрээһин ыытылынна. Аксения уонна Наталья Посельскаялар ааттарын сүгэр республикатааҕы балетнай оскуола (колледж) выпускниктара уонна үөрэнээччилэрэ кыттыылаах композитор К.Герасимов музыкатыгар, Е.Тайшина туруоруутугар «Сказочная долина» спектакль төрөөбүт дойдутугар туруорулунна. Манна сүрүн оруоллары Муоматтан төрүттээхСуорун Омоллоон аатынан опера уонна балет тыйаатырын солиһа Айтал Ефимов уонна балетнай оскуола (колледж) үөрэнээччитэ Эрчим Слепцов толордулар. Даҕатан эттэххэ, Айтал эбэтэ Анна Николаевна Слепцова Индигир нэһилиэгэр өр сылларга култуураҕа үлэлээбит үтүө киһи, идэтинэн үҥкүүһүт, Аксения Посельская үөрэнээччитэ этэ. Чурапчы Хадаарыттан төрүттээх. Билиҥҥэ диэри кинини олохтоохтор умнубакка истиҥник саныыллар. Сиэнэ Айтал Чурапчы күтүөтэ, кэргэнэ Болтоҥо нэһилиэгиттэн төрүттээх, кыыс оҕолоохтор.
Уолаттарбыт Айтал уонна Эрчим иккиэн Муоматааҕы искусство оскуолатыгар үөрэнэн, куорсун анньынан салгыы талааннарын сайыннара А. уонна Н. Посельскаялар ааттарын сүгэр Дьокуускайдааҕы балетнай оскуолаҕа үөрэнэ барбыттара.
Айтал Ефимов балетнай оскуоланы үөрэнэн бүтэрэн салгыы Москва куоратыгар хореография академиятыгар үөрэммитэ. Москваҕа «Русский балет” классическай үҥкүү ансаамбылыгар киирэн элбэх сирдэри кэрийбитэ, араас оруолларынан талаанын көрдөрбүтэ. Билигин Сахатын сиригэр төннөн кэлэн, үлэлии-хамсыы сылдьар, айар-тутар.
Эрчим Слепцов Муоматтан төрүттээх, элбэх оҕолоох Уваровскайдар-Слепцовтар удьуордарын кэскиллээх ыччата. Кинини аан бастаан сүрүн оруолу ситиһиилээхтик толорбутунан ис сүрэхтэн эҕэрдэлиибит. Өссө да сайдан, үҥкүү алыптаах үөрүүтүн бар дьонугар бэлэхтии турдун диэн баҕарабыт.
Бу бэлиэ түгэҥҥэоҕолорун үөрүүлэрин үллэстэн, Муоматааҕы оҕо искусствотын оскуолатын дириэктэрин Анна Митрофановна аатыттан эҕэрдэлээн, Чурапчытааҕы оҕо искусствотын оскуолатын дириэктэрэ Алла Иннокентьевна Сивцева уонна Муоматтан төрүттээх Чурапчытааҕы оҕо искусствотын оскуолатын завуһа Мария Егоровна Борисова (Корякина) үрдүк сыанаҕа тахсан учууталларын бэлэҕинтуттардылар.
Оҕолорбутун үрдүк ситиһиилэринэн эҕэрдэлээн, өссө да сайда турдуннар, көрөөччүлэргэ үҥкүүлэрин бэлэхтии, махталларын ыла турдуннар диэн алгыыбыт.
Бэлиэтээн эттэххэ, колледжка Муоматтан элбэх оҕо үөрэнэн, идэ ылан олох киэҥ аартыгар тахсыбыттара, билигин даҕаны үөрэнэ сылдьаллара киһини үөрдэр. Түгэнинэн туһанан, колледж дириэктэригэр, СӨ үтүөлээх артыыһыгар Дария Ивановна Дмитриеваҕа уонна кини кэргэнигэр Муома оройуонун бочуоттаах олохтооҕор, СӨ норуодунай артыыһыгар, колледж преподавателигэр Дмитрий Дмитриевкэ махтанабыт. Өссө даҕаны талааннаах оҕолору үҥкүү алыптаах эйгэтигэр сирдии, арыаллыы турдуннар.
Айталина Николаева