Биһиги оройуоммутугар олохторун кинигэ ааҕыытын тарҕатыыга анаабыт дьон аҕыйаҕа суох. Олортон бүгүн биһиги кэпсиир киһибит бибилэтиэкэ бэтэрээнэ, Саха Республикатын култууратын туйгуна Людмила Афанасьевна Старкова буолар. Бу күннэргэ кини өрөгөйдөөх 70 сааһын туолла, онтон сөбүлүүр идэтинэн үлэлээбитэ эһиил 50 сылын туолар.
Людмила Афанасьевна төрөппүттэрэ Галина Ананьевна уонна Афанасий Федотович Старковтар оройуоҥҥа биллэр дьоһун ыал этэ. Аҕата Афанасий Федотович өр сылларга райком бастакы сэкирэтээринэн үлэлээн, оройуону салайбыта. Ийэтэ Галина Ананьевна бибилэтиэкэр үөрэхтээх, идэтинэн өр сылларга кииннэмит библиотекаҕа, онтон кэлин дириэктэринэн үлэлээбитэ.
Людмила кыра эрдэҕиттэн кинигэ эйгэтигэр сыстан, ийэтин курдук бибилэтиэкэр идэтин баһылаабыта. Төрөөбүт Муоматыгар 50- ча сыл устата сөбүлүүр идэтинэн үлэлээн кэллэ. Күн аайы араас ис хоһоонноох кинигэлэри уларсар, дьону кытта алтыһан үлэлиир. Билигин саҥа кинигэ киириитин учуоттуур, ону филиалларынан тарҕатан, киирбит кинигэлэри фондаҕа киллэрэр, сорох кинигэлэри учуоттан таһаарар эппиэтинэстээх үлэлээх. Күн аайы үлэтигэр үөрэ-көтө кэлэр. Бииргэ үлэлиир кэллиэгэлэригэр үтүө сүбэтин- аматын тиэрдэ сылдьар. Саҥа кэлбит исписэлиистэргэ көмөлөһөн, сүбэлээн, Людмила Афанасьевна наставник быһыытынан кэлэктиипкэ үрдүктүк сыаналанар.
Людмила Афанасьевна эдэр сааһыттан общественнай үлэҕэ көхтөөх буолара. Оччотооҕу комсомол сиэринэн элбэх субботниктарга, араас конференцияларга кыттан оройуон общественнай олоҕун хамсатара. Аҕыйах сыллаахха диэри дьахталлар оройуоннааҕы Сэбиэттэрин чилиэнинэн актыыбынайдык үлэлээбитэ. Кини киэҥ көҕүстээх, сэмэй майгылаах, аргыый мичээрдээн ылан ааҕааччылары куруук үөрэ көрсөр.
Людмила Афанасьевна тапталлаах кэргэн, истиҥ ийэ, эйэҕэс эбэ. Олоҕун аргыһын Василий Иннокентьевич Слепцову кытта икки кыыс, икки уол оҕолонон, дьоһун-мааны ыал буолан олороллор, сиэн көрсөллөр. Оҕолоро улаатан, идэ ылан, Дьокуускай куоракка уонна төрөөбүт оройуоннарыгар үлэлии – хамсыы сылдьаллар. Людмила Афанасьевна хаһаайка быһыытынан минньигэс аһынан дьонун-сэргэтин күндүлүүр, дьиэтин таһыгар оҕуруот олордон дьонун битэмииннээх аһынан хааччыйар. Аны дьиэтин тула араас сибэкки олордуутунан дьарыктанар, куораттан аҕалан олорпут харыйалара үүнэн силигилээн, саҥа дьылга гирлянда уотунан умайан олохтоохтору үөрдэр.
Биир идэлээх күндү киһибитин Людмила Афанасьевнаны өрөгөйдөөх үбүлүөйгүнэн эҕэрдэлиибит. Өссө да сүбэ- ама буола сылдьаргар, үлэҕэр үрдүк ситиһиилэри, оҕолоруҥ, сиэниҥ ситиһиилэринэн кынаттанан уһуннук дьоллоохтук олороргор баҕарабыт. Айыыһытыҥ араҥаччылыы, Иэйэхситиҥ эҥэрдэһэ сырыттын!
Оройуоннааҕы кииннэммит
бибилэтиэкэ үлэһиттэрэ