Улуу Кыайыы 80 сылыгар аналлаах Кыайыы былааҕа бүгүн Муома оройуонугар кулун тутар 3 күнүгэр кэллэ. Былааҕы Муома оройуонун аҕа баһылыга Аммосов Дмитрий Викторович, бэтэрээннэр сэбиэттэрин бэрэссэдээтэлэ Слепцова Евдокия Ивановна уонна полиция майора Иванов Василий Иванович үөрүүлээх быһыыга-майгыга көрүстүлэр.
Хонуу нэһилиэгэр киэҥ спортивнай саалаҕа нэһилиэк олохтоохторо Кыайыы былааҕын көрсөр үөрүүлээх тэрээһиҥҥэ кыра кылаас үөрэнээччилэриттэн саҕалаан, ытык бэтэрээннэргэ тиийэ тоҕуоруһа муһуннулар. Тэрээһин үрдүк таһымнаахтык бэрт долгутуулаахтык ааста. Ол курдук, Кыайыы былааҕын полиция майора Иванов В.И. салайан, баһаарынай чаас байыастара уонна орто оскуола юнармия чилиэннэрэ арыаллаан киллэрдилэр. Эҕэрдэ тылы оройуон аҕа баһылыга Дмитрий Викторович Аммосов кэнчээри ыччакка туһулаан эттэ. Сэрии сылларын, уоттаах сэриигэ олохторун толук уурбут дьоммут үтүө аатын умнубакка өйдүү-саныы сылдьыахтаахпыт диэн тоһоҕолоон бэлиэтээтэ. Салгыы Хонуу нэһилиэгин баһылыга Дягилев Иван Евгеньевич кыайыы былааҕа кэлбит кэрэ-бэлиэ күнүнэн мустубут бар дьонун эҕэрдэлээтэ. Бэтэрээннэр сэбиэттэрин бэрэссэдээтэлэ Слепцова Евдокия Ивановна эйэлээх олоҕу уһансыбыт бэтэрээннэргэ махтанна. Муома орто оскуолатын 11 кылаааһын үөрэнээччитэ Слепцов Альберт кэнчээри ыччат аатыттан бу тэрээһин улахан суолталааҕын бэлиэтээн, эдэр көлүөнэ умнубакка, эппитигэр-хааммытыгар иҥэрэн илдьэ сылдьыахпыт диэн мэктиэ тылын тиэртэ. Ким да умнуллубат, туох да умнуллубат диэн бигэргэттэ. Кыра кэнчээри оҕолорбут сэрии тиэмэтигэр хоһоон ааҕан кэлбит ыалдьыттар сэҥээриилэрин ыллылар. Индигир нэһилиэгин эр дьонун ансаамбыла “Хайыһар” ырыаны бэлэх ууннулар. Тэрээһини аэропорт салайааччыта Винокуров Ю.А. хомоҕой тылынан өрө көтөҕүүлээхтик иилээн-саҕалаан ыытта. Салгыы Кыайыы былааҕа оройуон нэһилиэктэринэн сылдьыаҕа, онтон Абый оройуонугар айанныаҕа.