Улуу Кыайыы 79 сылыгар аналлаах оройуон тэрилтэлэрин бырааһынньыктыы холуонналара Кыайыы болуоссатыгар кэккэлээтилэр. Ол иһигэр өлбөт үйэлээх полк холуоннатыгар Муоматтан сэриигэ кыттыылаахтара Максим Черемкин, Константин Соркомов, Гаврил Соркомов, Петр Старков, оройуоҥҥа үлэлээн-олорон ааспыт П. И Павлов, И.А. Петров, А.В. Рачинскай, Ф.И. Максимов уо.д.а. сэрии кыттыылаахтарын хаартыскалара баар. Биир колоннаҕа оскуола улахан кылаастарыгар ыам ыйыгар ыытыллыбыт “Зарница “ байыаннай оонньуу кыттыылаахтара кэккэлээтилэр.


Аҕа дойду Улуу сэриитин кыттыылаахтарыгар аналлаах обелискаҕа гирлянда уурулунна. Украинаҕа буола турар байыаннай дьайыыга сырдык тыыннарын толук уурбут биир дойдулаахтарбытыгар «Зарница» кыттыылаахтара сибэкки дьөрбөтүн уурдулар.


Сарсыардаттан күммүт чаҕылыччы тыган, кыралыын-улаханныын дьон-сэргэ сүргэтэ көтөҕүлллүбүтэ сүдү. Диктордар өрөгөйдөөх саҥаларынан мустубут дьону Кыайыы күнүнэн эҕэрдэлииллэр. Трибунаҕа оройуон баһылыгын солбуйааччы Акулина Кульбертинова, Муома нэһилиэгин баһылыга Иван Дягилев, бэтэрээннэр Сэбиэттэрин бэрэссэдээтэлэ Евдокия Слепцова эҕэрдэлэрэ дьон көҕүн өссө күүһүрдэллэр.
Салгыы тэрилтэлэр түмсүү бөлөхтөрүнэн байыаннай ырыалары ыллаатылар, оҕолор үҥкүүлээтилэр. Кыайыы оһуохайа ыраахха диэри дьиэрэйдэ.
Улуу Кыайыы бырааһынньыгар анаммыт тэрээһин чэрчитинэн “Индигир уоттара” хаһыат бирииһигэр эстафета, тэрилтэлэринэн Спартакиада ыытылынна.