Олунньу 14 күнүгэр Төрөөбүт тыл, сурук-бичик күнүн чэрчитинэн уһуйаан оҕолоругар оройуоннааҕы «Аман Өс» күрэх бэрт тэрээһиннээхтик ыытылынна. Быйылгы күрэх тиэмэтэ Улуу Кыайыы үбүлүөйдээх 80 сылыгар ананна. Манна алта уһуйаантан бэлэмнэнии бөлөхтөр иитиллээччилэрэ кытыннылар.
Олохтоммут үгэс быһыытынан оскуолаҕа киириэн иннинээҕи саастаах оҕолор «Аман Өс» күрэхтэрэ тиһигин быспакка «Кэскил» уһуйааҥҥа ыытыллар.
Тэрээһин үөрүүлээх арыллыытыгар «Кэскиллэр» «Муомалар сэрии сылларыгар» диэн инсценировка көрдөрдүлэр. Уһуйаан үлэһиттэрэ Прасковья Слепцова, Александра Ларионова, Надежда Слепцова, Ньургуйаана Дьяконова, Иван Атласов оруолларын олус итэҕэтиилээхтик оонньоон көрдөрдүлэр. Оҕолор оруолларын уһуйаан кырачааннара толордулар. Инсценировка сценарийа бэркэ табыллан туруоруллубут. Оҕолор көрөллөрүгэр диэн анаммыт кылгас туруоруу гынан баран сүрдээх дириҥ ис хоһоонноох, үөрэтэр-иитэр суолталаах. Биригэдьиир оруолун толорбут Иван Петрович муомалар киллэрбит кылааттарын сыыппаранан дааннайдары кэпсээбитин оччотооҕу сэбиэскэй дьон дойдуларыгар бэриниилээхтэрин, бары биир сомоҕо күүс буолан аччыктыыры, тоҥору-хатары аахсыбакка, бары Кыайыыны уһансыбыттарын иһийэн олорон иһиттибит. Уһуйаан иитиллээччилэрэ Гурьев Коля, Барашков Артём, Нестеров Тимур Муоматтан сэриигэ барбыт буойуттар
биографияларын боччумнаахтык туттан туран кэпсээтилэр. Үс саастаах Тимур Нестеров балайда уһун тиэкси өйүгэр хатаан олох иҥнибэккэ аахпытын мустубут дьон сөхтүлэр.
Бу тэрээһиҥҥэ күрэх кыттааччыларын кэпсээннэриттэн бары да билии-көрүү өттүнэн эбилиннибит, урут билбэтэхпитин биллибит-иһиттибит. Бу буолар тэрээһин сүрүн соруга — үүнэр ыччаты патриотическай тыыҥҥа иитии, историяны билии, саҥарар-кэпсиир дьоҕуру сайыннарыы.
Дьүүллүүр сүбэ быһаарыытынан түмүк маннык буолла:
«Кылаан Чыпчаал» үрдүк ааты Пахомов Тимур («Кэскил») ылла.
Маҥнайгы үрдэл — Соркомов Максим («Кэнчээри»), иккис үрдэл — Слепцова Сайыына («Сказка»), үһүс үрдэл — Егорова Лилия («Чуораанчык»), маҥнайгы үктэл — Егоров Никон (» Теремок»), иккис үктэл — Стручкова Милена (Соболоох) буоллулар.
Оҕолорбутун — кэлэр кэнчээри ыччаппытын маннык тыл-өс, куолу күрэхтэригэр көхтөөхтүк кытыннаран инникитин төрөөбүт тылларынан санааларын сахалыы сайа этэллэрин көҕүлүүр, төрөөбүт дойдуларын историятын үөрэтэллэригэр олук уурарбыт кэм-кэрдии ирдэбилэ, иитэр-үөрэтэр үлэбит сүрүн соруга буолар.