Муома оройуонугар үөрэҕирии тэриллибитэ 95 сылын чэрчитинэн бүгүн Муома алын сүһүөх оскуолатыгар: «Учуутал үрдүк аатын өрө тутан» — диэн 3 уонна 4 кылаастарга музейнай уруок буолла. Музейнай уруокка кыттыыны ылла Муома алын сүһүөх оскуолатын 2 » б » кылааһын учуутала , методическай холбоһук салайааччыта, Саха Республикатын үөрэҕириитин туйгуна Валентина Валерьевна Новгородова. Валентина Валерьевна үөрэммит оскуолатыгар кэлэн үлэлээбитэ 25 сылын туолла. Ол усталаах туоратыгар элбэх оҕону иитэн — үөрэтэн, олох киэҥ аартыгар киллэрдэ. Кини үөрэппит оҕолоро орто оскуоланы ситиһиилээхтик үөрэнэн бүтэрэллэр. Ол курдук үөрэппит оҕолоруттан элбэх оҕо кыһыл уонна үрүҥ көмүс мэтээллэринэн оскуоланы бүтэрбиттэрэ. Үөрэппит оҕолоро араас идэни талан, үлэһит буолан, республика араас муннуктарыгар үлэлииллэр. Олор истэригэр уонтан тахса оҕо учууталларын суолун батыһан , учуутал идэтин талан , учууталлыы сылдьаллар. Валентина Валерьевнаҕа түгэнинэн туһанан үлэтигэр үрдүктэн үрдүк ситиһиилэри баҕарабыт. Үөрэппит оҕолоро учууталларын куруук үтүө тылынан ахта — саныы сырыттыннар.
Музей салайааччыта Слепцова Антонина Яковлевна.