Атырдьах ыйын иккис өрөбүлүн күнүгэр (быйыл 11 чыыһылаҕа) Арассыыйаҕа уонна сорох СНГ дойдуларыгар Тутааччы күнэ бэлиэтэнэр. Бу бэлиэ күнү 1955 сыллаахха ССРС Үрдүкү Сэбиэтин Президиума олохтообута. Дойдубут үрдүнэн сылын аайы тутуу биир тэтиминэн күүстээхтик бара турар.
Оройуоммутугар сүүс сыл тухары араас дьиэ-уот олохтоох уонна кэлии дьон сыраларынан тутулунна. Өр сылларга Хонууга тутууга үлэлээбит биир дойдулаахпыт, билигин куорат олохтооҕо Валерий Николаевич Хабаров үлэтин сырдатар:
— Биһиги Хонууга стройучаастакка «Момская МПМК» биригээдэтигэр Сергей Неустроев салалтатынан үлэлээбиппит. 90-с сылларга дьиэ бөҕөтүн туппуппут. Билиҥҥи полиция дьиэтэ, коммунальнай хонтуората икки этээстээх гостиницаҕа ананан тутуллубута. Билиҥҥи кулууп акылаатын биһиги биригээдэ түһэрбитэ. Афанасий Старков уулуссаҕа урукку эргэ порт ортотугар икки этээстээх аҕыс квартиралаах олорор дьиэни уонна Сэбиэскэй уулуссаҕа уон икки квартиралаах икки панель дьиэни туппуппут. Аэропорт вокзалын тутууга эмиэ биһиги биригээдэ үлэлээбитэ. Вокзал уһуннук тутуллубута. ПМК эстибитин кэннэ араас биригээдэ үлэлээн нэһиилэ бүтэрбиттэрэ. Электростанция бетон сыбаайаларын туруорбуппут, акылаатын эмиэ бетонунан куппуппут. Бу объект дьэ уһуннук тутуллубута, сэбиэскэй кэмҥэ саҕаланан баран билиҥээҥҥэ диэри ситэриллибэккэ турар.Элбэх киһи сыралаах үлэтин ылбыта. Кэлин пожарнай депо акылаатыгар эмиэ үлэлээбитим. Онтон коммунальнай хаһаайыстыба тэрилтэтигэр суоппардыы барбытым.
Сэбиэскэй былаас эстэн элбэх тутуу хаалбыта: райком таас дьиэтэ, пожарнай депо, бассейнаах улахан таас детсад, стройучаастакка улахан гараж сыбаайалара эрэ түспүтэ. Сиэн үрдүгэр стройучаастакка улахан котельнай тутуллуохтааҕа, тулатынааҕы дьиэлэри итиинэн хааччыйыахтаах этэ да, акылаата эрэ оҥоһуллубута. Онно эмиэ биһиги биригээдэ дьаныардаахтык үлэлээбиппит. Тутууга сырабын-сылбабын ууран үлэлээбит кэммин олус сылаастык ахтабын.
Күһүн аайы бииргэ үлэлиир дьоммун кытта куобахтыыр уонна аллара баран балыктыыр этибит. Үчүгэй да кэмнэр ааспыттара. Сэбиэскэй кэмҥэ тутууга көмүс көлөһүннэрин тоҕон геройдуу үлэлээбит бары табаарыстарбын уонна биир дойдулаахтарбын Тутааччы күнүнэн эҕэрдэлиибин. Кытаанах доруобуйаны, дьоллоох олоҕу баҕарабын.
Тутууга үлэлээбитим
