Бу күннэргэ оройуоммут баһылыга Дмитрий Аммосов Дьокуускай куоракка тустаах министерстволарга-ведомстволарга сылдьан оройуон кыһалҕаларын быһаарсар. Ол курдук, Арктика сайдыытын министерствотыгар сылдьан оройуон киинигэр тутуллуохтаах торговай-логистическай киин эһиил үлэҕэ киирэрин туруоруста, министр Владимир Черноградскайдыын инники тускуллары быһаарыстылар. Индигир уонна Чыбааҕылаах нэһилиэктэригэр оскуола тутуутун туруорсуу уонча сыл инники күөҥҥэ сылдьар. Үөрэҕирии тэрилтэлэрэ, чуолаан спортивнай саалалар эргэрэн капитальнай өрөмүөнү эрэйэллэр. Оройуон киинигэр типовой тутуулаах детсад тутуута былаантан түспэт. Бу ыйыллыбыт кыһалҕалары быһаарыыга ананна баһылыкпыт саҥа анаммыт үөрэҕирии миниистирин Ньургууна Соколованы кытта көрсүһүүтэ. Көрсүһүү үтүө түмүктээх буолуутугар оройуон куратора Кыыдаана Слепцова элбэх көмөнү оҥордо. Оройуоммут инники сайдыытын түстүүр сүрүн тускуллар Федерация Сэбиэтин тус комитетын чилиэнэ, сенатор Сахамин Афанасьевтыын анал көрсүһүүга торумнаннылар. Онон оройуоммут баһылыга Дмитрий Аммосов тустаах командировката тускуллаахтык саҕаланна.
