Арчы дьиэтигэр бу дьыл төрдүс кыбаарталыгар тобуллаҕас сытыы өйдөөхтөр, тулуурдаахтар мустан күрэхтэстилэр.
СаДуоба. Бу саҥа тэнийэн эрэр оонньууну Муомаҕа комсомол райкомун иккис сэкирэтээринэн, орто оскуолаҕа учууталынан, коммунальнай хаһаайыстыбаҕа дириэктэринэн үлэлээбит, Муома оройуонун бочуоттаах гражданина Попов Алексей Алексеевич 75 сааһыгар анаан ыытылынна. Оонньуу түмүгүнэн кыайыылаахтарынан эр дьоҥҥо: Ефимов П.П. – 1 миэстэ, Иванов П.С. – 2 миэстэ, Петров В.М. – 3 миэстэ, дьахталларга: Слепцова Т.А. – 1-кы, Слепцова М.Н. – 2-с миэстэ буоллулар. МОО 11-с кылааһын үөрэнээччитигэр Слепцов Альберка «Кэскиллээх оонньооччу» анал аат тигистэ.
Саахымат. Бу күрэҕи үлэ, тыыл бэтэрээнэ, советскай-партийнай үлэһит, Муома оройуонун бочуоттаах гражданина, саахымакка ССРС спордун маастарыгар хандьыдаат Слепцов Петр Иннокентьевич 100-сааһыгар анаан оҕолоро, сиэннэрэ, аймахтара тэрийдилэр. Күрэххэ Слепцов Г.П. — 1-кы миэстэлээх кубогы, Ефимов П.П. – 2-с, Пилюченок В.А. — 3-с миэстэни ыллылар. Дьахталларга: Корякина А.И., Слепцова С.А., Слепцова Е.И. бириистээх миэстэни үлэһиннилэр. Оҕолорго Слепцов Альберт – 1-кы, Хадаров Никита – 2-с, Гореев Дима – 3-с буолуллар.
Дуобат: Сэрии сылларын оҕото, үлэ, авиация бэтэрээнэ, нуучча дуобатыгар Россия спордун маастарыгар хандьыдаат Корякин Иван Иванович 85 сааһыгар анаан оҕолоро, сиэннэрэ дуобат күрэҕин тэрийдилэр.
Дуобаты таптааччылар хатыһыылаах оонньууларыгар кыайыы өрөгөйүн биллилэр. Эр дьоҥҥо Черов А.А. – 1-кы, Новикова Л.Х. – 2-с, Слепцова Т.А. – 3-с миэстэлэри ыллылар. Оҕолорго Слепцов Альберт – 1-кы, Андросов Никита – 2-с, Кириллин Миша – 3-с миэстэлэргэ тигистилэр.
Корякин Иван Иванович аатыгар «Аэропорты Севера» тэрилтэ (дир. Ю.А. Винокуров) анал бирииһин олохтообутун спорт бэтэрээнигэр Слепцова Мария Николаевнаҕа туттардылар.
Бу үгүс күрэх кыайыылаахтара мэтээллэри, сэртипикээттэри, харчынан бириистэри, бэлэхтэри туттулар, анал бириистэр хаһаайыттара буоллулар.
СаДуоба, саахымат, дуобат күрэхтэригэр А.В. Карпов аатынан оҕо спортивнай оскуолатын тириэнэрэ, СӨ үөрэҕириитин туйгуна Слепцов Алескандр Васильевич суудьуйанан үлэлээтэ.
Бу үс күрэҕи тэрийбит дьон, кыттааччылар, кэлбит ыалдьааччылар Арчы дьиэтин салайааччыта, СӨ култууратын үтүөлээх үлэһитэ Слепцова Ирина Николаевнаҕа, РСФСР үөрэҕириитин туйгуна, бэтэрээннэр сэбиэттэрин бэрэссэдээтэлэ Слепцова Евдокия Ивановнаҕа, аһылыгы астаан, күрэхтэри ыытыыга бары усулуобуйаны тэрийбит Арчы эйэҕэс эбэлэригэр истиҥ махталларын биллэрдилэр.
Евдокия Слепцова,
бэйэбит корр.