Бэҕэһээ оройуоммут баһылыга Дмитрий Аммосов үөрэхтэригэр уһулуччу ситиһиилээх, общественнай үлэҕэ бастыҥ үөрэнээччилэри кытта «төгүрүк остуол» ньыматынан аһаҕас кэпсэтии ыытта. Кэпсэтиигэ оройуон киинин уонна нэһилиэктэр оҕолоро кыттыыны ыллылар. Дмитрий Викторович оройуону салайар уустук үлэни билиһиннэрэн туран үөскүүр кыһалҕалары хайдах быһаарыахха сөбүн быһаарда. Оҕолор түгэнинэн туһанан нэһилиэктэригэр баар кыаллыбатах кыһалҕалары кэпсээтилэр. Индигиртэн сылдьар лидер нэһилиэккэ килиэп буспат буолан олохтоохтор эрэйдэнэллэрин этэн туран маны хайдах быһаарыахха сөбүй диэн ыйытта. Дьиҥэ, Буор Сыһыы бөһүөлэгэр килиэп буһарар оборудование да сөптөөх дьиэ да баар эбит. Килиэп буһарар баҕалаах киһи көстүбэт диэн буолла. Аҕа баһылык Хонууга эдэр дьон килиэп уонна булочнай оҥоһуктары буһаралларын холобур этэн баран Индигирдэргэ эмиэ күүстээх санаалаах ыччат көстөн бу кыһалҕаны туоратыан сөбүн сүбэлээтэ. Чыбааҕылаах нэһилиэгин бэрэстэбиитэллэрэ оскуола дьиэтэ эргэрбитинэн саҥа оскуола тутуутун туруорустулар. Бу тутуу проектнай-сметнай докумуоннара бэрэбиэркэни ааһан олоххо киирэрэ бигэргэммит эрээри, нэһилиэккэ оҕо ахсаана көҕүрүү турара дьиксиннэрэр. Оройуон киинин оҕолоро урут футбол оонньуур площадкаларыгар балыыһа тутуллан оонньуур сирдэрэ суох буолтун кэпсээтилэр. Хонууга спортзал тутулларын туруорустулар. Маны таһынан араас көрсүһүүлэри, тэрээһиннэри ыытарга, общественнай түмсүүлэри үлэлэтэргэ, кыһыҥҥы лааҕырдары тэрийэргэ туспа дьиэ ананыаҕын санаттылар. Кэпсэтии барарын тухары аҕа баһылык төрөөбүт дойдуга таптал, кииниҥ түспүт сиригэр ытык иэс өйдөбүллэри табыгастык туттан көрсүһүү бэрт истиҥник ааста. Оҕолор кыбыстыбакка оройуоммут сайдыытын түстэһиигэ бэйэлэрин санааларын эттилэр, мунаарар ыйытыыларын быһаартардылар. Маннык аһаҕас кэпсэтиилэр инникитин да ыытылла турдуннар.
«Муома оройуона» МТ пресс-сулууспата.
