Олунньу 6-8 күннэригэр оройуон Аҕа баһылыга Дмитрий Аммосов ыраах сытар учаастактарынан айан суолунан
тиийэн ороййон ааспыт сыллааҕы үлэтин нэһилиэнньэ иннигэр туруорда. Бастакы күн оройуон Сэбиэтин депутаттарын бэрэссэдээтэлэ С. Н. Мараказов, “ОДьКХ” ГУП Муоматааҕы филиалын салайааччыта В. В. Корякин, СӨ “ОДьКХ” ГУП кылаабынай энергетига Н. А. Данилов, “Арктика суоллара” КТ Муоматааҕы учаастагын салайааччыта К. К. Терешкин, култуура Управлениетын начальнига Ю. П. Черов, тыа хаһаайыстыбатын Управлениетын начальнига А. Р. Софронов, үөрэҕирии Управлениетын начальнига А. А. Крупышева, архитектура уонна тутуу отделын салайааччыта В. Д. Слепцов, экология инспекциятын салйааччыта Ю. Д. Васильев састааптаах оробуочай бөлөх Чуумпу Кытыл бөһүөлэгэр үлэлээтэ. 
Киэһэ мунньахха, отчуот кэнниттэн олохтоохтору долгутар саҥа оскуолата тутуутун боппуруоһа болҕомтоҕо киирдэ. Манна үөрэҕирии салаатыттан Анастасия Афанасьевна тутуу барыыта демография балаһыанньатыттан улахан тутулуктааҕын бэлиэтээтэ. Оройуоҥҥа Орто Дойду уонна Индигир оскуолаларын тутуута былааҥҥа баар, бары докумуоннара ситэриллэн туран. Оттон Төбүлэх оскуолатын докумуонун оҥоһуута саҕалана илик. “Оскуола
хапытаалынай өрөмүөн прорамматыгар хапсыан сөп дуо?” диэн ыйытыкка, бу үүммүт сылынан маннык программа
тохтуохтааҕын, үөрэх министиэристибэтэ туруорсуутун күүһүнэн салҕанара этилиннэ. Ол эрээри, быйыл оройуоҥҥа бу программаҕа хапсыбатылар, эһиилгигэ былаанныыбыт. Онон тэрилтэ бюджетын экономиятын суотугар эрэ өрөмүөнү ыытар суолу тобулуохха сөп. Бөһүөлэккэ баар уһуйаан дьиэтин туруга үчүгэй. 2026 сылтан уһуйааннарга маннык хабааннаах программа үлэлиэхтээх, онно кыттарга бары өттүнэн эрдэттэн бэлэмнэниэххэ наада.
Салгыы киирбит ыйытыктарынан, оройуон иһигэр авиарейстар көтүүлэрэ пассажир ахсааныттан, төһө толору таһаҕас баарыттан тутулуктааҕа этилиннэ. Социальнай уонна пенсионнай сулууспалар анал десант тэрийэн, туспа кэлэн үлэни ыытыахтара. Оптоволокно сибээһэ оройуоҥҥа быһа холоон Сааһыыр, Соболоох суолунан эргийэн Хонууга диэри 2025 сылга былааҥҥа турар. Туһалаах баайы-дуолу хостуур “Поиск Золото” тэрилтэттэн киирэр үп-харчы олохтоох салалта быһаарыытынан таба хаһаайыстыбатын тэрийиигэ уонна Төбүлэх оскуолатын остолобуойун тупсарыытыгар былааннанар. “Эргэ бөһүөлэк” диэки ититэр ситим тардыллыыта хочуоллар кыамталарыттан, тардыллыахтаах турбалар хаһан кэлэллэрэ, ону тэҥэ техническэй усулуобуйа, смета докумуоннарыттан эмиэ тутулуктааҕа быһаарылынна. Бэйдиэ ыттар кыһалҕалара, ветеринар испэсэлиистэр суохтара таарылынна. Бу боппуруос оройуоннааҕы бэтэринээринэй сулууспа Чурапчыттан оройуоҥҥа төттөрү оннугар көстөҕүнэ быһаарыллыан сөп. Олохтоохтор доруобуйа харыстабылын эйгэтигэр ФАП дьиэтин миэбэллэрэ уларыйаллара уолдьаспытын сэргэ тиис, харах быраастара кэлэ сылдьалларыгар көрдөстүлэр.
Көрсүһүү түмүгэр оскуола бастыҥ үөрэнээччилэригэр оройуон баһылыгын сыаналаах бэлэҕэ, Махтал суруга
үөрүүлээх быһыыга-майгыга туттарылынна. Ол иһигэр байыаннай дьайыыга дьоруойдуу сэриилэспит Александр
Кудрин балта Джамиля Халыма-Индигир уокуругун норуот депутата Гаврил Алескеев саҥа дьыллааҕын бэлэҕин тутта.
Гаврил Соркомов, Герой-Ийэ Вера Соркомова, Николай Егоров, Анна Старкова, Евдокия Ковлекова баһылыктан
Махтал суруктары, харчынан, анал чаһынан бэлэхтэри туттулар. Эҕэрдэлиибит!
Сарсыҥҥы күнүгэр оробуочай бөлөх Өймөкөөн улууһунан эргийэн Сааһыырга айаҥҥа турда.
"Муома оройуона" МТпресс-сулууспата