Бэҕэһээ Саха Республикатын Правительствотын анал бөлөҕө Чыбааҕылаах нэһилиэгин олохтоохторугар ситэриилээх былаас 2024 сылга ыыппыт үлэтин отчуотун туруорда.
Чыбааҕылаахтар сыл аайы Правительствоҕа туруорсар боппуруостара биир: оскуола-саад тутуута. Олохтоох оскуола дьиэтэ 1941 сыллаахха тутуллубута. Ол кэмтэн туһалыы тураахтыыр эргэ оскуолабыт. Детсад дьиэтэ оҕолор үрдүлэригэр сууллар кутталга киирбитигэр 2022 сыллаахха начальнай оскуола дьиэтигэр көһөрүллүбүтэ. Онон былыргы оскуола эбии кыараабыта, үөрэнэргэ усулуобуйа өссө мөлтөөбүтэ. Саҥа оскуоланы тутуу боппуруоһа өссө сытыырхайбыта. Ол эрээри бу да сырыыга боппуруос оннуттан хамсаабатах. Оскуола тутуута былырыын 7 уочаракка турбута соннук оннунан хаалбыт. Ол кэмҥэ сыллата саҥа оскуолалар үлэҕэ киирэллэрэ отчуоттанар диэн олохтоохтор айманаллар. Кырдьык да ханна эрэ улахан, киэҥ, сырдык оскуолалар үлэҕэ киирэллэрин киһи эрэ ымсыыра көрөр. Арай Сайдыы оскуолатын тутуллар уочарата сыл аайы ыраатар курдук. Арктика министерствота кэмигэр улаханнык өйөөн Орто Дойду уонна Индигир оскуолаларын тутууга бырайыактыыр смета (проектно-сметная документация) үбүлээһинин төлөөн турар. Уонтан тахса мөлүйүөҥҥэ оҥоһуллубут ПСД туттуллар кэмэ бүтэрэ чугаһаата. Оскуола тутуллар уочарата ол тухары хамсаабат. Оччотугар уонунан мөлүйүөн күдэҥҥэ көтөр дуо диэн олохтоохтор сөпкө боппуруоһу күүскэ туруорсаллар. Кырдьык да абалаах, сыл аайы оскуола эргэтин, сууллаары турарын саҥа истэр курдук балаһыанньа! Тустаах салалта быһаарбытынан быйыл Республика инвестпрограмматыгар биир да оскуола тутуута киирбэтэх. Отчуокка кэпсэнэр оскуолалар атын үбүлээһининэн тутуллар эбиттэр. Биһиэхэ ол хантан кыаллыай?! Сайдыылар ханнык ааны тоҥсуйан дуу, тэбиэлээн дуу оскуолабыт тутуллар уочаратын чугаһатабыт диэн ыйытыыларыгар депутаттары хамсатыҥ диэн буолла. Дьиҥэ, муомалар сенаторга тиийэ үүммүт депутаттаах этибит. Онон эрэлбит Россия Федерациятын сенаторыгар Сахамин Миланович Афанасьевка хаалар буоллаҕа. ПСД болдьоҕо бүтэ илигинэ оскуолабыт тутуута саҕаланарын булгуччулаахтык туруорсуохха диэн олохтоохтор күүстээх санааны ыллылар.
Правительство отчуотун мунньаҕар маны таһынан мелиорация, өртөөһүн, көмүс хостооһунун, оройуоҥҥа быраас тиийбэтин, авиабилет, бензин сыаната үрдүү турарын тула боппуруостар туруорулуннулар. Быйылгы отчуот мунньаҕа бэрт сэргэхтик барда. Туруорсуулар оруннаахтар. Эһиилги отчуокка олоххо киирбиттэрин туһунан тустаах иһитиннэриилэри кэтэһэ хаалла хотугу эргимтэҕэ олорор үлэһит дьон. Арктика ыраах муннугар олорор чыбааҕылаахтар оскуола тутуутун туруорсар сытыы боппуруостарын Республикабыт Ил Дархана Айсен Сергеевич Николаев тус болҕомтотугар ылан инвестпрограммаҕа киллэттэриэ диэн муомалар эрэлбит улахан.
Христина Кривошапкина