“Муома оройуона” МТ дьаһалтата, депутаттар орйоуннааҕы Сэбиэттэрэ оройуон норуотун үөрэҕириитин бары үлэһиттэрин – сырдыгы, үйэлээҕи саҕар күндү учууталларбытын, кырачааннары Билии дойдутугар сиэтэн киллэрэр иитээччилэри, үөрэҕи-билиини баһылыыр, улаатар бары үөрэнээччилэри, иитээччилэри үүммүт Саҥа 2023-2024 үөрэх дьылынан итиитик-истиҥник эҕэрдэлиибит!
Оройуон үүнэр көлүөнэтэ дириҥ билиилээх, чэгиэн-доруобай буола улаатарыгар ыытар түбүктээх үлэҕитин үрдүктүк сыаналыыбыт. 2023 сыл Россия Президенэ Владимир Путин ыйааҕынан Уһуйааччы уонна аҕа сүбэһит сылынан биллэриллибитэ. Онон үөрэҕирии эйгэтигэр араас тэрээһиннэр ыытыллаллар, сонун бырайыактар олоххо киирэллэр, уһуйааччылар айымньылаах үлэлэрин, билиилэрии, сатабылларын, дьоҕурдарын көрдөрөллөр.
«Үөрэҕирии» национальнай бырайыагынан дойдуга, өрөспүүбүлүкэҕэ саҥа үөрэх объектара тутуллан киирэллэр, хапытаалынай өрөмүөн ыытыллар. Быйылгы үөрэх дьылыгар Муоматааҕы бастакы сүһүөх оскуола саҥалыы тыыннанан, тупсарыллан үөрэнээччилэргэ, учууталларга сырдык, ыраас кылаас ааннарын арыйыаҕа. Маннык дьаһаллар салгыы ыытыллыахтара. Оройуоҥҥа үөрэх-билии кыһаларын бырайыактара бигэргэтиллэллэр, тутуулара саҕаланыаҕа.
Күндү учууталлар! Үүммүт үөрэх дьылыгар кэскиллээх түбүктээх үлэҕэ үрдүк ситиһиилэри, хас биирдиигитигэр кытаанах доруобуйаны, дьолу, саҥаттан саҥа үрдэллэри баҕарабыт.
Оскуола талааннаах үөрэнээччилэринэн аатырар. Быйылгы Үлэ сылыгар оскуола оҕолоро сайыҥҥы сынньалаҥнарыгар туһалаахтык атаардылар, элбэх оҕо араас эйгэҕэ көмөлөһөн үлэлээтэ. Бу күннэргэ бастыҥнары чиэстиэхпит. Талааннаах, киэҥ билиилээх, дэгиттэр сайдыылаах оҕолорбут үүнэ-үксүү турдуннар.
Д.В. Аммосов, оройуон баһылыга