Муома оройуона эвен культуратын биһигэ диэн биллэр. Ол курдук, бастакы эвен суруйааччыта Николай Тарабукин, бастакы эвен поэта Василий Лебедев, ырыаһыт Петр Старков бары Муоматтан төрүттээхтэр. Билигин айар үлэлэринэн бастыҥнар истэригэр ааттаналлар поэтесса Евдокия Бокова, суруйааччы Мария Федотова-Нулгынэт.
Бүгүн оҕо айар Дьиэтигэр эвен алфавитын сүрэхтэниитэ буолла. Алфавиты Люлия Таркова уонна Никита Неустроев бэлэмнээбиттэр. Кинилэргэ «Чуораанчык» сурунаалтан Ньургуйаана Захарова уонна Сардаана Матвеева көмөлөспүттэр. Алфавит сүрэхтэниитигэр Дьокуускайтан «Кэскил» кинигэ издательствотын редактордара Анна Слепцова уонна Карина Оконешникова кэлэн ыалдьыттаатылар. Дьоро тэрээһиҥҥэ оройуоммут аҕа баһылыга Дмитрий Аммосов, олохтоох аҕыйах ахсааннаах норуоттар Ассоциацияларын салайааччылара Зульфия Саввина, Анна Саввина, оскуолалар уонна уһуйааннара бэрэстэбиитэллэрэ кыттыыны ыллылар. Алфавит сүрэхтэниитигэр кыттыбыт дьон оҕо айар дьиэтигэр тустаах медиашкола арыллан сонун сүүрээн түмүгүнэн эвен тылын үөрэтиигэ торум буолар алфавиты оҥоруу үлэтин билистилэр. Алфавит электроннай көрүҥүн сэҥээрэ көрдүлэр. Оройуон аҕа баһылыга Дмитрий Аммосов инникитин эвен тылын, культуратын үөрэтиигэ кинигэ таһаарыахха сөп диэн этиитин мустубут дьон сэргээтэ, биһирээтэ. Куораттан ыалдьыппыт Анна Слепцова Муома оройуонун талааннаах оҕолорун туһунан анал балаһаҕа матырыйаал хомуллуохтааҕын кэпсээтэ, бииргэ үлэҕэ ыҥырда. Алфавит оҥоруутугар үлэлээбит Люлия Тарковаҕа, Никита Неустроевка, Айхал Соловьевка махтал сурук туттарда. Тэрээһин сээдьэнэн түмүктэннэ.
«Муома оройуона» МТ пресс-сулууспата.