Оһуокай – норуот тылынан айымньытын биир бэлиэ көрүҥэ, бэрт былыргыттан киэҥник биллэр, тарҕаммыт. Саха киһитэ ыһыахха оһуокайдаан тыынын таһаарар, этин-сиинин эрчийэр. Уһун кырыа кыһын кэнниттэн күөххэ үктэнэн, сайыны көрсөн, уруйдаан ыһыах ыһыллар. Онно айыыларга сүгүрүйэн, күнү уруйдаан оһуокай алгыс, итэҕэл үҥкүүтэ буолар.
Ахсынньы 10 күнүгэр Дьокуускайга өрөспүүбүлүкэтээҕи «Оһуокайдаан ойуохха, эһиэкэйдээн тэйиэххэ» оһуокай күрэҕэр араас оройуоннартан оҕолор муһуннулар. Аксения уонна Наталья Посельскаялар ааттарынан Үрдүкү балет оскуолатыгар ыытылынна. Оһуокай күрэҕин үөрүүлээх арыллыытыгар СӨ култуураҕа уонна духуобунай сайдыыга миниистирэ Афанасий Ноев кыттыыны ылла.Күрэххэ 16 улуустан 60-тан тахса кыттааччы кэлбит. Икки түһүмэҕинэн 7-12 уонна 13-17 саастаахтарга ыытылынна.
Дьүүллүүр сүбэ сүрүн болҕомтону этээччи тылыгар-өһүгэр, туттарыгар-хаптарыгар, сөпкө хамнаныытыгар, дьону түмэригэр уурда. Ол курдук, күрэх түмүгүнэн Уус Алдан оройуонун оҕолоро кыайыы өрөгөйүн биллилэр уонна харчынан бириистэри туттулар.
Биһиги оройуоммутуттан икки оҕо кытынна. Ол курдук Муома орто оскуолатын үөрэнээччилэрэ Ангелина Петрова (сал.С.С.Старкова), Костя Архипов(сал.А.К.Николаева)маннык үрдүк таһымнаах күрэскэ аан маҥнай кыттан сүрэхтэниини аастылар. Дьүүллүүр сүбэ оҕолорбутун бэлиэтии көрөн, Костялаах Ангелина оһуокай түһүлгэтин дьонун сэҥээриитин ыллылар.
Ангелина 6-с кылааска үөрэнэр. Саха тылын сэҥээрэн, хомуска оонньуур, норуот ырыатынан, оһуокайынан дьарыктанар.Салайааччыта оҕо оскуолатын преподавателэ Светлана Старкова дьоҕурдаах кыыска саха норуотун үтүө үгэстэрин иҥэрэр. Ангелина омугунан нуучча эрээри, төрүт омук култууратын интэриэһиргээн өрө тутар, онон оҕолорго холобур эрэ буолуон сөп.
Костя 11 кылааска үөрэнэр, быйыл оскуоланы бүтэрээри сылдьар. Кыра кылаастан хомуска дьарыктаммыта, хоһоон ааҕыытынан үлүһүйбүтэ, сыанаҕа ыллыыр, артыыстыыр, олоҥхону толорон улуустааҕы күрэххэ быйыл анал аат ылбыта. Кини оһуокайга быйылгыттан утумнаахтык дьарыктанна. Инникитин култуура эйгэтигэр үөрэнэр баҕалаах.
Оҕолоро үрдүк таһымнаах күрэххэ кытта баралларыгар күүс-көмө буолбут төрөппүттэргэ М.П. Петроваҕа, К.Н. Дягилеваҕа, үөрэҕирии управлениетын салайааччытыгар А.А.
Крупышеваҕа, кылаабынай исписэлиис Е.Г. Кириллинаҕа уонна бары өйөөбүт дьоммутугар барҕа махтал тылларын тиэрдэбит.
СӨ Бырабыыталыстыбата, Култуура уонна Үөрэх министиэристибэлэрэ өйөөн үрдүк таһымнаах күрэх ааста. 2022 сылга оһуокайбыт “Арассыыйа 100 саамай чулуу норуот объектарын» иһигэр киирбитэ. Билигин оҕолортон, ыччаттан тутулуктаах: норуот айымньыта – оһуокайбыт — сайдыыта уонна кэскилэ.
Айталина Николаева