Бэҕэһээ Муомаҕа СӨ Бырабыыталыстыбатын бэрэссэдээтэлин солбуйааччы Георгий Степанов салайааччылаах оробуочай бөлөх 2023 сылга ыыппыт үлэтин-хамнаһын отчуоттуу кэллэ. Маҥнайгы күн кинилэр икки бөлөҕүнэн арахсан ыраах нэһилиэктэргэ — Төбүлэххэ уонна Улахан Чыыстайга үлэлээтилэр.
ТӨБҮЛЭХ НЭҺИЛИЭГЭ.
Төбүлэх — оройуон кииниттэн саамай ыраах сытар нэһилиэк. Олунньу ый 1 күнүнээҕи туругунан нэһилиэккэ
198 киһи олорор. Аҕыс ыал кэтэх хаһаайыстыбатыгар ынах сүөһүнү тутар: 41 төбө ынах сүөһү, онтон 11-рэ ыанар ынах. Чааһынайдар
178 сылгылаахтар, онтон 137-тэ биэ. Ону таһынан ыалларга
25 куурусса баар.
Айан суола үчүгэй буолан мунньах кыттыылаахтара Төбүлэххэ алта чааһынан түргэнник сыыйылыннаран тиийдилэр. Бырабыыталыстыба отчуотун иккис бөлөҕүн координаторынан Үлэ уонна социальнай сайдыы миниистирин маҥнайгы солбуйааччыта Альбина Трубина сылдьар. Бөлөххө инновация Министиэристибэтин отделын салайааччы Дмитрий Васильев, суол сулууспатын Департаменын салайааччытын солбуйааччы Софья Кузьмина, тыа хаһаайыстыбатын уонна ас-үөл бэлиитикэтин миниистирин солбуйааччы Прокопий Николаев сырыттылар.
Отчуоту истэн баран олохтоохтор кинилэри долгутар ыйытыыларын биэрдилэр, бэйэлэринэн кэлбит дьоҥҥо кыһалҕаларын туруорустулар.
Төбүлэхтэр сүрүннээн тыа хаһаайыстыбатыгар сыһыаннаах ыйытыылары биэрдилэр:
— бэтэринээрнэй сулууспа Чурапчы улууһугар көһүөҕүттэн улахан мэһэйдэри көрсөллөрүн;
— өртөөһүн;
— ходуһа сирдэрин эргэриитэ;
— адьырҕа кыыллар тыа хаһаайыстыбатыгар хоромньулара;
— родовой көс община тэринэргэ көмө;
— бааһынай хаһаайыстыбаларга транспортнай нолуокка чэпчэтии;
— оройуон киинигэр — Хонууга үүт тутар пуун үлэтин сөргүтүү.
Ону таһынан олохтоохтору оптоволокно киириитэ, оскуола тутуута кыаллыбат буоллаҕына капитальнай өрөмүөн хаһан хайдах ыытыллыаҕа долгутар.
Төбүлэхтэр төһө да оройуон кииниттэн ыраах олордоллор олус сэргэхтик, тып-тап курдук бэркэ дьаһанан олороллор. Бу да киэһэ ситэриилээх былааһы кытта астык кэпсэтии таҕыста. Аҕыйах да буоллаллар, олус көхтөөхтүк кытыннылар.
Отчуот түмүгүнэн Төбүлэх нэһилиэгин олохтоохторо СӨ бырабыыталыстыбата 2023 сыллаах үлэтин-хамнаһын биһирииллэрин биллэрдилэр, бу курдук ситэриилээх былаас нэһилиэнньэни кытта сирэй көрсөн, үлэлэрин отчуоттаан баралларын сэргииллэрин эттилэр.
Салгыы оробуочай бөлөх Соболоох нэһилиэгэр айаннаата.