Н. А. Брызгалов аатынан Индигир орто оскуолата сылын аайы былааннаахтык оҕуруот аһын олордон сылы быһа сиир хортуоппуйдарын, хаппыысталарын, сүбүөкүлэлэрин, моркуоптарын көдьүүстээхтик үүннэрэллэр. Оҕуруот үлэтигэр көмөлөһүннэрэр инниттэн «Эдельвейс» лааҕыр тэрийэн оҕолору оҕуруот үлэтигэр үөрэтэллэр. Лааҕыр бастакы сезона үлэтин бэс ыйын 10 күнүттэн саҕалаата. Быйыл оскуолаҕа оҕуруот, кэрэ эйгэ, от хайысхалаах биэс лааҕыр үлэлиэхтээх. Манна оҕону тулуурга, үлэҕэ үөрэтии үгэс буолбута ыраатта. Оҕолор итиигэ буһаллар-хаталлар, кумаарга да сиэтэллэр. Ол да буоллар сыллата лааҕырга кэлэ тураллар. Уһаабыта биэстии сыл сылдьыбыт оҕолор бааллар. Кинилэр сыллата уопутуран оҕуруот үлэтин баһылыыллар. Оҕо сайыҥҥы сынньалаҥын сөптөөхтүк тэрийэн индигирдэр күөх сайын быйаҥын туһанан өлгөм үүнүүнү хомуйар былааннаахтар.
