Бэс ыйын 5-10 күннэригэр «Спортивные якутяне» диэн үөрэнээччилэр Спартакиадаларын
чэрчитинэн көҥүл тустууга биирдиилээн уонна хамаанданан бастыҥы быһаарар күрэх Дьокуускай
куорат «Өрөгөй» уорҕатыгар буолан ааста.
Өрөспүүбүлүкэ оройуоннарыттан уонна Дьокуускай куораттан уопсайа 28 хамаанда мустан тэҥ-
тэҥҥэ кииристилэр. Муома оройуонун чиэһин сэттэ тустуук көмүскээтэ: Березкин Эльдар (38 кг,
СОО, 6 кылаас), Ильина Виола (45 кг, МОО, 7 кылаас), Ильин Ярослав (48 кг, МОО, 8 кылаас),
Михайлова Ангелина (50 кг, ИОО, 6 кылаас), Слепцов Тимур (68 кг, МОО, 8 кылаас), Слепцов Эрсан
(85 кг, МОО, 7 кылаас), Черов Антон (57 кг, ИОО, 7 кылаас). Оҕолортон уһулуччу көрдөрүүнү
Ильина Виола ситистэ. Кини 45 киилэҕэ 13 оҕоттон III бочуоттаах миэстэҕэ таҕыста. Уопсайа үстэ
тустан иккитэ кыайда, биир хотторуулаах. Черов Антон үс круг туһунна, икки кыайыылаах.
Оҕолорбут бары да туста сатаатылар, бэйэлэрин кыахтарынан. Күрэхтэһиилэрэ суоҕа оҕуста,
улахан мэһэй буолла.
Чурапчы хамаандатын састаабыгар тустан биһиги ыччаппыт Стручков Мичил 57 киилэҕэ II
миэстэҕэ таҕыста. Тустуу күрэҕин уопсай түмүгэр 28 хамаандаттан муомалар биһиги XVII-с миэстэ
буоллубут, онтон бэйэбит төрдүс группабытыгар эрэллээхтик I миэстэни ыллыбыт.
Оройуон үөрэнээччилэрин хамаандата өрөспүүбүлүкэ таһымнаах спорт тэрээһинигэр кыттыыны
ылбытыгар бары спортсменнар, тренердэр ааттарыттан аҕа баһылыкпытыгар Д. В. Аммосовка,
үөрэҕирии салаатын салайааччыта Г. П. Соркомовка, оройуон дьаһалтатын спорт салаатын үлэһитэ
В. В. Неустроевка, оҕолорбут төрөппүттэригэр барҕа махталбытын тиэрдэбит. Өссө да бу курдук
араас таһымнаах спорт тэрээһиннэригэр ситиһиилээхтик кыттыахпыт. Кыайыыларбыт иннибитигэр
диэн бүк эрэллээхпит.
Бэлиэтээн эттэххэ, оҕолор куоракка көтөр ороскуоттарын төрөппүттэр уйуннулар. Ити кинилэр
оҕолорун ис сүрэхтэриттэн өйөөн, түмсэн, санааларын ууран сүүрэн-көтөн көмөлөспүттэрэ, сүбэ-
ама буолбуттара инникитин да биһиэхэ кыайыылар, ситиһиилэр кэлиэхтэрэ диэн улахан эрэли
үөскэтэр. Оройуон дьаһалтата кыахтаах, кыайыыга дьулуурдаах оҕолорбутун болҕомтоҕо ылан,
суолталаан, барыы-кэлии ороскуотун төлүөх буолбута күүспүтүгэр күүһү эбэр, санаабытын
бөҕөргөтөр.