Хоту сиргэ, өбүгэлэрбит үтүө үгэстэрин салҕаан, тарбахтарыгар талааннаах дьахталлар элбэхтэрэ үөрдэр.
Соторутааҕыта оройуоннааҕы библиотека тэрийиитинэн "Осикат" ЭКК киэҥ саалатыгар уус-уран оҥоһуктар быыстапка- дьаарбаҥкалара тэрилиннэ. Бу тэрээһиҥҥэ Индигир, Чыбааҕылаах нэһилиэктэриттэн илии оҥоһуктар турдулар уонна сүрүннээн Хонуу сэлиэнньэтин талааннаах тарбахтаахтарын үлэлэрэ дьон болҕомтотугар ананнылар. Үгүс көрөөччүлэр кэрэхсибиллэрин Ирина Никулина кылтан оҥоһуктара ылыан ыллылар. Маастар бу дьикти дьарыгы чахчы баһылаабыта үлэлэригэр өтө көстөр. Көрбүт эрэ сөхтө, атыылаһаары ыйытта. Олус кэрэ көстүүлээх мааны да мааны маҥан суумка элбэх кэрэ аҥардар куттарын тутта, атыыга турбата хомотто.
Көрөөччүлэр инникитин Ирина Михайловна кылтан оҥоһуктары атыыга таһаарыан, маны таһынан тустаах дьарыкка маастар-кылаас ыытыан баҕаралларын туһунан санааларын үллэһиннилэр. Индигир орто оскуолатын учууталлара дьэрэкээн ойуулаах, тупсаҕай бэйэлээх шкатулкалары оҥорон аҕалан быыстапкаҕа туруорбуттара атыыга хамаҕатык бардылар. Учууталлар түбүктээх үлэлэриттэн бириэмэ ордорунан олус интэриэһинэй дьарыктаахтара кэрэхсэнэр эрэ. Уопсайынан оройуоммут кэрэ аҥардара араас илиинэн оҥоһуктары оҥорор буолбуттара киһини сөхтөрөр. Быыстапкаҕа кэлбит дьон хоту сир аҕыйах ахсааннаах норуоттарын ассоциацияларын Муоматааҕы салаата тэрийэн ыыппыт маастар-кылаастарыгар көхтөөхтүк
кытыннылар. Ол курдук, тыс имитиитигэр Евдокия Слепцова, этэрбэс тигиитигэр Надежда Савинова, оҕуруоттан
быыһык оҥоруутугар Надежда Слепцова, "Дөбдүргэ" харысхалы баайарга Анна Саввина, таба төбөтүн сүлэргэ Сардаана Афанасьева үөрэттилэр. Тыс имитиитин кистэлэҥнэрин Евдокия Егоровна киһиэхэ өйдөнөр гына кэпсээн маастар кылааска кыттыбыт дьон олус сэҥээрдилэр. Мантан инньэ тыс имитэр дьон эбиллиэхтэрэ диэн эрэниэххэ. Надежда Леонидовна этэрбэс тигэргэ бэйэтин сатабылын үллэһиннэ. Элбэх киһи харысхал баайыытыгар үөрэннилэр.
Бу оҥоһуктар анал байыаннай дьайыыга сылдьар буойуттарбытыгар ыытыллар буолан олус эппиэтинэстээх уонна
кэрэхсэбиллээх. Надежда Слепцова ыыппыт дьарыгар эмиэ элбэх киһи үөрэннэ. Таба төбөтүн сүлүүгэ холонор киһи
аҕыйах. Уһуннук халбаһыы сыаҕар үлэлээбит маастар Галина Терешкина уонна театр режиссера Максим Васильев бу уустук дьарыкка холоннулар. Кэлбит дьон бу тэрээһини олус сөбүлээтилэр. Инникитин маннык маастар кылаастары Арчы дьиэтигэр өрөбүллэргэ ыытыахха сөп эбит диэн Наталья Слепцова санаатын үллэһиннэ. Индигиртэн сылдьар бэтэрээн учуутал Вера Иннокентьевна тэрээһини сөбүлээбитин, элбэҕи билбитин туһунан санаа атастаста. Элбэх оҕо ийэтэ, эбэтэ Тамара Слепцова бары дьарыктарга кыттыбыт үөрэн туран кэпсээтэ. Быыстапкаҕа кыттыбыт дьон тустаах сертификат туттулар. Олус туһалаах, умсугутуулаах тэрээһин үрдүк таһымҥа ыытылынна.
Христина Кривошапкина