Бу күннэргэ оройуоммутугар өссө биир үөрүүлээх сонун кэлбитэ. Ол курдук Муомабыт көмүс куоластаах күөрэгэйэ
Екатерина Корякина аан дойду таһымнаах куонкуруска үрдүк ситиһиилэннэ.
Айталина Афанасьева – Адамова аатынан II норуоттар икки ардыларынааҕы опера ырыаһыттарын куонкуруһа
Дьокуускай куоракка бу күннэргэ буолан түмүктэннэ. Тэрээһин «Азия оҕолоро» VIII спортивнай оонньууларын
култуурнай бырагырааматын чэрчитинэн ыытылынна. Манна барыта 23 эдэр толорооччу Арассыыйаттан,
Монголияттан, Кытайтан, Белоруссияттан уонна Францияттан кытынна.
Куонкурус түмүгүнэн Суорун Омоллоон аатынан опера уонна балет тыйаатырын солистката, биир дойдулаахпыт
Екатерина Корякина Гран — при буолан Саха сирин өссө төгүл аатырта. Ону таһынан, I, II истиэпэннээх
лауреаттарынан Монголияттан Доржцэдэн Бат-Эрдэнэ уонна Харалгарав Мунхтувшин бэлиэтэннилэр. Үһүс
бириэмийэни Екатерина Захарова (Саха сирэ) уонна Бор Батсайхан (Монголия) үллэһиннилэр. Дипломант аатын
Кытайтан Хуанг Тидо уонна Саха сириттэн Лия Винокурова ыллылар. Анал бириистэринэн Суорун Омоллоон
аатынан опера уонна балет тыйаатырын артыыстара Мария Шапошникова уонна Мария Михайлова, Саха сирин
государственнай филармониятын артыыһа Юлия Караченцева, Монголияттан Лхагваджав Пуревдорж,
Беларуссияттан Екатерина Евстафьева бэлиэтэннилэр.
Муома дьоно Катябытыгар, кини төрөппүттэригэр уонна дьиэ кэргэнигэр истиҥ эҕэрдэбитин тиэрдэбит.
Екатерина истээччилэрин кэрэ куолаһынан абылыы турдун диэн алгыыбыт.
Татьяна Данилова