Муома оройуонугар доруобуйа харыстабылын объектара эргэрэн саҥа балыыһа тутулларын туруорсан элбэх баһылык бэйэтин кэмигэр сүүрбүтэ. 2011 сыллаахха оройуоҥҥа ыытыллыбыт СӨ Бырабыыталыстыбатын көһө сылдьар мунньаҕа балыыһа тутуутун Боротокуолга киллэртэ эрээри үбүлээһинэ кыаллыбат буолан бастаан оскуола тутуллар буолта. Онтон балыыһа тутуутун боппуруоһа ырааттар ыраатан умнуллууга барта. 2018 сыллаахха талыллыбыт оройуон баһылыга Иван Павлов балыыһа комплексын туттарыыга күүскэ туруммута.
Балыыһа бырайыагын саҥаттан оҥотторон, кэргэнинээн Наталья Георгиевналыын тустаах салайааччылары тылларыгар киллэрэн өр сылларга быһаарыллыбатах бырайыак олоххо киирэр буолбута. Бэдэрээтчит булан, кэпсэтии ыытан үлэ күөстүү оргуйбута. 2021 сыллаахха күһүн балыыһа бастакы сыбаайата түспүтэ. Бу тэрээһиҥҥэ оччолорго СӨ экологияҕа миниистирэ Сахамин Афанасьев, СӨ судаарыстыбаннай сакаасчыт сулууспатын генеральнай директорын солбуйааччы Михаил Черов, «Кинг-95» ААУо генеральнай директорын солбуйааччы Оганес Варжапетян кыттыыны ылбыттара. Кэнэҕискитин кинилэр балыыһа тутуутун хонтуруоллаан тиһэҕэр тириэрдиспиттэрэ.Эҕэрдэ тылыгар Иван Петрович өрө көтөҕүллэн туран 2024 сылга бу турар сирбитигэр балыыһа комплекса тутуллан киириэ диэн бэрт эрэллээх куолаһынан эппитигэр сорохтор итэҕэйбэтэхпит. Бэдэрээтчит өттүттэн бэйэтинэн кэлэн хотугу эргимтэҕэ суох балыыһа баараҕай тутуутун чиэстээхтик ыытыам, сотору кэминэн олохтоохтор сылаас балыыһа дьиэтигэр доруобуйаларын эмтэниэхтэрэ диэн бигэ тылын эппитэ. Балыыһа бастакы сваятын түһүүтэ олус тэрээһиннээхтик, үөрүүлээхтик ааспыта. Оччолорго ким билиэй-сэрэйиэй аҕыйах хонугунан өлөр өлүү хаарыан салайааччыбытын, доҕорбутун Иван Петрович Павловы соһуччу бу күн сириттэн илдьэ барыан… Ол эрээри балыыһа тутуутун боппуруоһа кумааҕыга хаалбакка олоххо киирэн билигин аныгы ирдэбилгэ толору эппиэттиир баараҕай балыыһа дьон олоҕун быыһыырга ананан үлэлии турара биһигини олус үөрдэр. Иван Петрович бу балыыһа тутуутугар киллэрбит кылаатын сөпкө сыаналаан Республикабыт Ил Дарханын тустаах дьаһалынан балыыһабытыгар Иван Павлов сырдык аата иҥэрилиннэ.
Айсен Сергеевич Муомаҕа бэйэтинэн кэлэн бу үөрүүлээх сонуну иһитиннэрдэ. Кини эҕэрдэ тылыгар Иван Петрович ыыппыт үлэтин туһунан бэрт истиҥник аҕынна. Балыыһаҕа Иван Павлов аатын иҥэрэн үйэтиппиттэригэр махтанан Иван Петрович кэргэнэ Наталья Георгиевна тыл эппитэ мустубут дьону долгутта. Ил Дарханы кытта кэлбит Правительство бөлөҕө, Ил Түмэн депутаттара саҥа балыыһабыт иһигэр киирэн аныгы медицинскэй оборудованиелары көрөн үрдүктүк сыаналаатылар. Балыыһабыт сөптөөх быраастарынан хааччылларыгар бу тэрээһин сөптөөх оҥкул түһэрдэҕэ диэн эрэл санаалаах хааллыбыт.