Бүгүн, олунньу 20 күнүгэр «Ийэ сүрэҕэ» дьахталлар кулуубтара кэлэн иһэр Аҕа дойду көмүскээччилэрин күннэрин көрсө анал байыаннай дьайыыга сылдьар уолаттарбытыгар көмө оҥорор сыалтан ас-таҥас атыытын дьаарбаҥкатын тэрийэн ыыттылар. Дьаарбаҥка үрдүк тэрээһиннээхтик ааста.
Манна оройуон киинин 18 тэрилтэлэрэ араас аһы, оҥоһуктары аҕалан атыылаатылар. Ол курдук, баай Байанай бэлэхтэриттэн саҕалаан араас кус-хаас, балык арааһа атыыга турда. Хаһаайкалар бурдук аһын арааһын астаабыттар. Ааспыт сайын дэлэгэй бэлэхтэрэ — отон, сугун, моонньоҕон, хаптаҕас, тэллэй арааһа, оҕуруот астарыттан туустааһын дэлэйдик турдулар. Дьон үөрэ-көтө атыылаһан дьиҥнээх бырааһынньык курдук ааста бырааһынньык.
Киирбит харчы анал байыаннай дьайыыга сылдьар уолаттарбытыгар барар буолан дьон сыананы аахсыбакка дэлэччи атыыласта. Үлэ ветераннара кыра биэнсийэлэриттэн ордорон көмө харчы ууналлара тэрийээччилэри үөрдэ долгутта. Дьахталлар кулуубтарын актива дьаарбаҥканы тэрийсибит, площадканы оҥорон биэрбит Арчы дьиэтин ветераннарыгар истиҥник махтаналлар. Бэлиэтээн этэр буоллахха, Арчы дьиэтин ветераннара уонна ыалдьыттарбыт — Индигир нэһилиэгин ветераннара холбоон 23500 солкуобайдаах аһылык атыылаан көмө киллэрбиттэрэ махталлаах.
Дьаарбаҥка туһунан сиһилии «Индигир уоттара » хаһыакка ааҕыҥ.