Биһиги нэһилиэккэ биир сааскы ылааҥы күн Индигир эбэбит туонатыгар «Эрчимнээх эр бэртэрэ» күрэхтэһии олус көхтөөхтүк ааста. Сандал сааспыт кэлбит бэлиэтэ — күн сылааһа, үчүгэйэ!
Нэһилиэкпит эр бэртэрэ түөрт хамаанда туруоран сэттэ түһүмэххэ — биатлоҥҥа, комбинированнай эстафетаҕа, массыына соһуутугар, кумахтаах куулу соһон, сүгэн сүүрүүгэ, ойбон алларыы, канат тардыһыыга, хомуур мас тардыһыытыгар күөн көрүстүлэр.
Бэрт сүүрүүлээх- көтүүлээх, ыһыылаах — хаһыылаах күрэх түмүгүнэн «Урааҥхайдар» хамаанда (кап. Иван Никулин уонна Александр Николаев, Айысхан Винокуров, Сандал Николаев) бастаата, иккис «Дохсун» (кап. Родион Хабаров уонна Александр Шкулев, Петр Никифоров, Ефрем Эверстов, үһүс «Кешкадон» (кап. Алексей Стручков уонна Игорь Попов, Алексей Ковлеков, Степан Григорьев), төрдүс миэстэ «Чолбон» (капитан Петр Стручков уонна Азат Атласов, Мирослав Ковлеков, Данил Соркомов). Күрэххэ кыттыбыт дьоҥҥо барыларыгар эр дьоҥҥо олус наадалаах бириистэр, ол курдук бастакы миэстэҕэ саха быһаҕа, иккискэ түөртүү кус мончууга, үһүстэргэ — мангал, төрдүстэргэ Ю. А. Слепцов анал бирииһэ туттарылыннылар. Бириистэри олохтоох дьаһалта, оскуола, почта, ФАП, ЖКХ, ДЭС, ветеринария, ИП А.Д. Шкулев, А.А.Корякин спонсордаатылар. Ону таһынан улуус баһылыгын Д.В. Аммосов анал бирииһэ — батас кэскиллээх спортсмен уолбутугар Ефрем Эврестовка тигистэ.
Спонсордаабыт бары тэрилтэлэргэ, биирдиилээн дьоҥҥо барҕа махталбытын тиэрдэбит!
Бу интэриэһинэй тэрээһини олохтоох Сынньалаҥ Дьиэтин үлэһиттэрэ Анастасия Никулина, Марина Эверстова, кылаабынай суудьуйа Владимир Васильев көҕүлээн-тэрийэн ыыттылар.
Людмила Стручкова