Дьулуһуом диэн Егор Слепцов-Дьөгүөрэ концера олоххо дьулуур, күүстээх санаа кыыма буолан көрөөччүлэри биир сомоҕолоото. Хас биирдии ырыа көхтөөх ытыс тыаһынан, «браво» хаһыынан доҕуһуолланна. Убайдарын, аҕа табаарыстарын өйөөн Василий Аммосов, Данил Слепцов истиҥ ырыаларынан концерт программатын ситэрэн биэрдилэр. Онон Сайдыы талааннаах уолаттара Хонуу олохтоохторугар бэрт сонун, ураты тыыннаах ырыа дьоро киэһэтин бэлэхтээтилэр.
Ырыа куттаах дьон олоххо дьулуурдара ураты буолар дииллэр. Дьөгүөрэҕэ ыллыыр талаан ийэтиттэн Кылаана Егоровнаттан бэрилиннэҕэ. Кыра эрдэҕиттэн ийэтин кытта кулуупка сылдьан музыканы дууһатынан ылынан дьоҕурун сайыннардаҕа.
Дьөгүөрэ оҕо эрдэҕиттэн босхоҥ буолан 12 сааһыгар диэри атаҕар турбатаҕа. Ол эрээри кини күүстээх санаатын булгуруппатаҕа, хайаан да хаамар туһугар аймаҕын Василий Осиповтыын күүстээхтик эрчиллэн атаҕар бигэтик туран, хааман дьонун-сэргэтин соһута үөрдүбүтэ. Кыра эрдэҕинэ Дьөгүөрэ олус чобуо этэ, миигин көрүстэ эрэ » бүгүн местнэйгэ туох көстөр?» диэн ыйытан соһутара. Төһө да хаампат буоллар билиитэ-көрүүтэ киэҥ, ыйытара элбэх буолара. Кэнники хаамар буолан баран уолбут дьарыга өссө эбиллибитэ. Тыаҕа сылдьарын сөбүлүүр буолан үгүс-элбэх табаарыстарын кытта бултуур, балыктыыр буолбута. Илиитигэр ураты күүстээҕэ тыаҕа сылдьарыгар олус туһалааҕа. Илиитин дьарыктаан араас хамсаныылары оҥорор талаанынан Дьөгүөрэ оройуон киинигэр киирэн Бахчы Баатыр ыыппыт «Минута славы» күрэҕэр бастаабытын өйдүүбүн. Онтон бэттэх Муомалар бу талааннаах уолчааны бэлиэтии көрөн куруутун сценаҕа тахсарын кэтэһэр буолтара.
«Нивалаах уолаттар» диэн республика эдэр ыччата сэҥээрэр ырыаһыттара бу Сайдыыттан төрүттээх Егор Слепцов, Василий Аммосов, Сандал Павлов буолаллар. Төрөөбүт дойду ахтылҕанын туһунан Сандал суруйбут ырыатын доҕотторо бүгүн Хонуу олохтоохторугар бэлэх ууннулар.
Егор Слепцову айар киэһэтинэн культура управлениетын салайааччыта Юрий Черов, «Осикат» этнокиин дириэктэрэ Алексей Варламов эҕэрдэлээтилэр, өйдөбүнньүк бэлэх, махтал сурук туттардылар. Оттон көрөөччүлэр махталларын дохсун ытыс тыаһынан биллэрдилэр.
