Сэтинньи 19 күнүгэр Муома оройуонун Хонуу нэһилиэгэр икки саҥа дьиэ үлэҕэ киирбитин бэлиэтиир кэрэ-бэлиэ түгэн буолан ааста. Биһиэхэ хоту сиргэ Арктикаҕа дьиэ тутуутун боппуруоһа сытыытык турар. Онон олохтоохтор үөрүүлэрэ улахан, кэтэһиилээх күннэрэ тосхойдо. Арассыыйаҕа Дьиэ кэргэн сылынан бэртээхэй бэлэх буолла.
Саҥа дьиэлэр саламанан киэргэтиллибиттэр. Ирина Слепцова — Аптаах Дукку алгыс оҥорон арчылаата. Алгысчыт аал уоту оттон, сыт таһааран, сиэри-туому тутуһан, алгыстаах алаадьынан айах тутан, саламаатынан, кымыһынан күндүлээн сирин-дойдутун аһатта, үрдүкү сырдык Күүстэргэ сүгүрүйдэ. Саҥа дьиэлэри арыйыы алгыһынан арчыланна, тойугунан айхалланна.
Салгыы тэрээһиҥҥэ Муома оройуонун аҕа баһылыга Дмитрий Аммосов эҕэрдэ тылын тиэртэ. Дойдуга буола турар быһыы-майгы кэмигэр маннык хаарбах дьиэттэн тахсыы бырагыраамата үлэлии турарын бэлиэтээтэ. Дойду бэрэсидьиэнэ В. Путин болҕомтоҕо ыларын, дьон олоҕо тупсарын туһугар үлэ барарын тоһоҕолоото. Дьиэ олохтоохторугар чэгиэн туругу, бигэ санааны, уйгу-быйаҥ олоҕу баҕаран иһирэх тылларын эттэ.
Муома нэһилиэгин баһылыга Иван Дягилев ис сүрэҕиттэн эҕэрдэлээн туран, дьиэни үлэҕэ киллэрбит тутуу хампаанньатыгар махтанна. Олохтоохтор дьоһун бэлэҕи туппуттарын бэлиэтээтэ. Дьонугар-сэргэтигэр туруктаах буолууну, уйгулаах олоҕу баҕаран үтүө тыллары тиэртэ.
ООО ЛПК “Алмас” бэрэстэбиитэлэ Дмитрий Исаков дьиэлэр хайдах тутуллубуттарын, үлэ хаамыыта хайдах барбытын кэпсээтэ. Дьиэлэр мастан тутуллубуттар. 2019 сыллаахха мас бэлэмнэнэн, 2020 сыллаахха Дьокуускайга аҕалыллыбыт, онтон Муомаҕа кыһыҥҥы суолунан тиэрдиллибитэ. Дьиэлэри тутууга туох кыһалҕалары көрсүбүттэригэр тохтоото. Ыраах сытар оройуоҥҥа транспортнай схемата уустугунан мэһэйдэри үөскэттэ. Онон бытаарыы таҕыста. Билигин даҕаны итэҕэс-быһаҕас баар буолуон сөп, ону биэс сыл иһигэр туоратар сорук турар.
Онтон кыһыл лиэнтэни үөрүүлээх быһыыга-майгыга быһыы ыытылынна. Маннык чиэс Муома оройуонун аҕа баһылыгар Дмитрий Аммосовка, Муома нэһилиэгин баһылыгар Иван Дягилевка уонна ООО ЛПК «Алмас» бэрэстэбиитэлигэр Дмитрий Исаковка тигистэ. Ол кэнниттэн олохтоохтор саҥа дьиэлэрин киирэн көрдүлэр. Сотору кэминэн саҥа дьиэлэргэ оҕо саҥата, күлүүтэ-үөрүүтэ толору, холумтана сылаас, уйгу-быйаҥ олохтоох дьол уйата буола туруоҕа.
Пресс-служба
«Момского района»