Оройуоммут киинигэр кэнники кэмҥэ уулуссаларга тротуардар оҥоһуллан, бөх контейнердара туруоруллан , киин
уулуссаларга турар дьиэлэр профлист күрүөлэнэн Хонуубут тас көрүҥэ тупсан испитэ. Ол эрээри аны
уулуссаларбыт сылгы уонна ынах сүөһү мэччийэр сиригэр кубулуйан эрэллэр. Билигин уулуссаҕа кырдьаҕас дьон
уонна кыра оҕолор сылдьалларыгар сылгы үөрдэрэ кутталы үөскэтэллэр. Транспордаах да дьоҥҥо сүөһүлэр суолга
мэһэйи оҥороллоро мэлдьэҕэ суох. Сылгы да, ынах да ыт курдук бырах сүөһү буолбатахтар, бары хаһаайыннаахтар.
Урукку сылларга дьон иитэр сүөһүлэригэр бэрт болҕомтолоохтук сыһыаннаһаллара. Ынахтарын ыан баран
хаһаайын мэччирэҥ сиригэр үүрэр буолара, киэһэтин ыҥыртааан аҕалан түптэлээн хоннороро оҕо саас биир
умнуллубат өйдөбүлэ буолан хаалбыт. Били ырыаҕа ылланарыныы “бостуук сайдыыр саҥата ол ааспыты санатар”.
Сүөһүлэр күөх оттоох киэҥ хонууларга мэччийдэхтэринэ үүттэрэ минньигэс, эттэрэ сыалаах буолар диэн өйдөбүл
баар.
Биллэрин курдук, тыа хаһаайыстыбатын сүөһүлэрин дьон бородууксуйа ылаары иитэллэр. Уопсай дьиэлэр
помояларыгар аһыыр ынахтар целлофаны уонна да атын буортулаах бөҕү сиэн сүөһүрэн ветеринарнай көмө
чаастатык оҥоһулларын тустаах сулууспа мэктиэлиир. Сылгылар, ордук кулунчуктар, араас тоһоҕону-тимири үктээн
бааһыраллар, истэрин тоҕо түһэн өлөллөр. Быйыл оройуон киинигэр түөрт сылгы туһата суох өлбүт. Онон
хаһаайыттар сүөһүлэригэр истиҥ сыһыан, болҕомто уураллара уолдьаста.
Хаһаайыттар РФ административнай буруйу оҥоруу кодексын тустаах ыстатыйаларынан уулуссаларга
бэйдиэ сылдьар сүөһүлэр көҥүллэммэтэх сиргэ мэччийэллэрин иһин, тротуардары, уулуссалары
киртитэллэрин иһин, суолга мэһэй үөскэтэллэрин иһин ыстарааптаныахтарын сөп. Маны таһынан
сүөһүттэн эчэйии ылбыт дьоҥҥо эбэтэр сүөһү олбуору, араас тутуулары алдьаттаҕына хаһаайын эппиэти
сүгэн сокуон иннигэр эппиэттиир. Оройуон киинигэр хаһаайыттарга тустаах өйдөтүү үлэтин ыытар
соруктаах тустаах рейдэлэр бу күннэргэ ыытыллыахтара. Бары бииргэ олорор бөһүөлэкпит ыраас, куттала
суох буолуутун ситиһиэххэ!
Христина Кривошапкина
