Этнопедагог, педагогика билимин хандьыдаата, ХИФУ дассыана Г. С. Попова — Санаайа 75 сааһыгар аналлаах «Дьиэ кэргэн — олох төрдө» диэн тиэмэнэн төрөппүт сугулаана Муома орто оскуолатыгар тэрилиннэ.
Сугулаан биэс түһүмэҕинэн ыытылынна :
Дьиэ кэргэҥҥэ истиҥ сыһыаны олохсутуу
Ийэ тылынан оҕону иитии
Уол оҕо — эрэллээх эркин, дурда-хахха
Кыыс оҕо — кэскил кэрэһитэ
Аныгы саха ыала.
Тэрээһин саҕаланыыта Галина Семеновна үөрэппит оҕолоро бу биэс тиэмэ ис хоһоонун арыйан хоһоон аахтылар.
Кэлбит төрөппүттэр оҕо иитиитин туһунан санааларын аһаҕастык үллэһиннилэр, кэпсэтиигэ көхтөөхтүк кытыннылар.
Аҕалар ыҥырыыны ылынан, оҕо иитиитигэр бэйэлэрин тус көрүүлэрин дьоҥҥо тиэрдибиттэрэ болҕомтону тарпыта.
Сугулаан кэмигэр Г. С. Попова 90-с сылларга ыыппыт тэрээһиннэрин уһулуга (видеота) көһүннэ, ол саҕана баар төрөппүттэр билэр оҕолорун, бэйэлэрин көрөн сэҥээрдилэр.
Бу күн Галина Семеновна экраҥҥа көстөн Муома дьонун, үөрэппит оҕолорун, биир идэлээхтэрин сахалыы сайаҕас тылынан эҕэрдэлээтэ.
Сугулаан бүтүүтэ кэлбит төрөппүттэргэ дьиэ кэргэн дьоллоох олоҕун түстүүр кэс тыллардаах бэлэҕи оскуола салалтата үөрүүлээхтик туттарда.
Төрөппүттэр олус сэргэх кэпсэтии, туһалаах ырытыһыы буолла диэн санааларын эттилэр
