…Быдан былыргы дьыллартан өбүгэлэрбит эт-хаан, билии-көрүү өттүнэн
ыччаттарын сайыннарарга улахан болҕомтолорун уураллара.
Онон аар-саарга
аатырбыттара, бөҕө бөҕөстөрү, кус быһыйдары, көмүс куолайдаахтары,
сытыы иҥиирдээхтэри, булугас өйдөөхтөрү мунньан үгэс буолбут
оонньуулары, күрэхтэри ыыталлара.
Ахсынньы 7 күнүгэр Дьокуускай куоракка «Триумф» спорт дыбарыаһыгар Алексей Никифоров аатын үйэтитэн төрүт оонньууларга өрөспүүбүлүкэтээҕи турниир буолан ааста.
Бу күрэҕи сылын аайы «ZEMA» устудьуоннар түмсүүлэрэ тэрийэн ыытар. Быйыл, уопсайа 15 оройуонтан күүстээх, түргэн-тарҕан боотурдар мустаннар күөн көрүстүлэр.
Сүрүн бириис 200 тыһ. солк., иккис миэстэ 150 тыһ. солк., үһүс миэстэ 100 тыһ. солк.
Маннык үрдүк таһымнаах күрэххэ Муома оройуонун устудьуоннара туора турбакка кыттыыны ылбыттара кэрэхсэбиллээх.
Биһиги улуустан 5 уол кыттыыны ыллылар, ол эбэтэр:
Егор Наумов-мас тардыҺыытыгар;
Слава Захаров-үс төгүл үс көрүҥэр;
Андриан Андросов –тутум эргииригэр, хапсаҕайга; Афоня Слепцов— балык былдьаһыытыгар, хапсаҕайга; Игнат Никулин— өһөс торбоско,хапсаҕайга.
Маны тэҥэ хамаанданан бары көһөҥөнү көтөҕүүгэ, хомуур хапсаҕайга кииристилэр.
15 хамаандаттан уопсай очукуонан ситиһиибит сэмэй да буоллар, уолаттар санааларын түһэрбэттэр, Муома оройуонун ыччаттара бааллар, көхтөөх кыттыыны ыллылар диэн көрдөрдөхтөрө!
Күннэтэ дьарыктанан эти-хааны, өйү-санааны эрчийэн, кыайыыга дьулуурдаах буолар сүрдээх улахан таһымнаах күрэххэ, биһиги оҕолорбут туора туран хаалбакка харса суох киирсэннэр, Муома оройуонун ааттата,көрдөрө сылдьаллара олус үчүгэй. Манна бу хамаанда түмсэн улахан күрэххэ кыттыытын үбүлээбит «Муома оройуона» МО дьаһалтатыгар, «ZEMA» түмсүү Муоматааҕы лидерыгар Майя Наумоваҕа махтаммат буолар сатаммат.
Өбүгэлэрбит үгэстэрин сиргэ-буорга симэлиппэккэ, сүтэрбэккэ, үгүс
үйэлэргэ туругура, угуйа туруҥ,өрүү инникигэ кэскиллээх, кыайыылаах, кус быһый, ат бөҕө буолуҥ диэн уолаттарбытыгар баҕа санаабытын тиэрдэбит!
…Бастакы хардыы,бастакы үрдэл,бастакы эрэбил, бастакы тирэх.
Маладьыастар, Муома уолаттара.
Светлана СЭНД.